هدية الشيخ هشام بارت 8

البارت الثامن

فجأة شافت شخص اجاها بس ما مبين وجهه ولا تكدر تشوفه ملثم...نفسه هذاك الشخص لابس دشداشة...

بس هالمرة لابس حزام مسدس وعيونه تجدح نار من الغضب ولزم ايمن العار وطلع سلاحة وحطاه براسه...

وماسمعت غير صوت الطلقة والدم تطاير وفزعت من جسمها روحها...

وفزت من كابوسها على صوت آية تكلها حوراء ولج كومي صارت مصيبة...

حوراء فزت مرعوبة:شصاير ولج

آية:نسمة بت عمي شردت ويه حبيبها 

حوراء سكتت وظلت مصنمة متفاجئة وماتصدك شتكول ماتدري تعرف نسمة خوش بنية...واجه ابالها حلمها بنفس الشخص كل ليلة..هو نفسه الي ساعدها ونقذها من ابن عمها....

حوراء كامت طلعت وتسمع الحجي والاوضاع صايرة حامية وصياح...وابوها معصب اخذ سلاحه وطلع وهي انرعبت وماتت خوف...

ونسوانه يصيحن لا تروح ياشيخ لتسوها دم الله يخليك ...وخواتها الزغار ظلن يبجن....

بس ابوها مايستمع لأحد وطلع وخابر ولده يلحكوه....

خلي نرجع ليورى شوي من طلعو كرار ونسمة بره الديرة...

طبعا نسمه كضتها بجي طول الطريق وكرار ابد ما وكف وتراجع.. ويكلها طول الطريق انو تسكت وراح نكون بخير ولتخافين ويهدي بيها...

نسمة ماتفهم هالحجي وتحس بغلطة جبيرة ارتكبتها بحق نفسها وحق اهلها...

وحتى كرار كل تفكيره ابوه وشلون راح يسامحه لو عرف والسالفة السواها مو شوية وراح تنزل قيمة ابوه وهيبته واحترامه كدام الناس...

ظل يباوع لنسمة حتى ينسه التفكير بكل هذا ويكول محد يتجرأ يكول بعد لو صارت زوجتي حلالي...

وصلو النجف بعد طريق طويل.. وكرار اخذها لبيت خاله..راح دك الباب وهو متوتر ومايعرف شيكل لخاله وراح يساعده لو لا...

نسمة ترجف وخايفة ودموعها اربعة اربعة وتعبانة من الطريق..ظلت تتقيأ بالباب وتعبت كلش...وكرار احتار بيها...

خال كرار فتح الباب وتفاجأ بكرار كدامه وياه حرمة وشافها تتقيأ...

امجد:كرار ولك شتسوي هنا..وراح حضنه..شلونك حبيبي وشجابك للنجف منو هالبنية وشبيها..شنو ازوجت ولك واني مادري

كرار:خالي حبيبي الحمدلله شلونك..خلي ندخل واشرحلك السالفة

امجد:اي بابا تعال البنية خطية شكلها تعبت من الطريق الطويل...

ودخلهم وصاح على ام اكرم مرته وكل لنسمة تدخل داخل... وراحت داخل يم مرت خال كرار واستقبلتها...وكرار يم خاله وكعدو يحجون...

كرار شرحله السالفة وخاله مارضه وعصب وشسوة بي كله شلون هيج تسوي بأبوك وبت العالم شلون هيج تسوي...

كرار:خالي هسة شلون تساعدني لو لا انه اجيت ومامنها رجعه هسة اكيد عرفو بالسالفة لازم اعقد عليها هنا ساعدني اروحلك فدوة خالي انته املي هنا

امجد بعصبية:وابوك المسكين مافكرت بي ماكلت شنو يصير بي ولو اجته جلطة ومات بسببك شتكول ساعتها هاااا شبيك متهور منو ما حب ومنو ما فارك حبيبه فهمني منو مات بفراك حبيبه..ارعن شساعدك بشنو..هسة اخابر هشام يجيك هنا

كرار لزم خاله:فداك روحي خالي افهمني انه اجيتك وكلي امل اساعدني لتكول لأبوي عن مكاني لمن تهدئ الاوضاع اروحلك فدوة

امجد بعصبية:ولك شيهديها بعد خاف يأذون ابوك بسبب طيشك وتهورك ولك انته ماخذ بتهم وشارد مو شويه هاي شيهديها..اخاف يسون بيك شي والله جان هسة كلت لأبوك

كرار باس راس خاله:فدوة رحتلك والله ماكدرت اتحمل تزوج طلبتها مرتين ورحتله مرة الثالثة ومقبل ينطيها الي فهمني خالو شناقصني ويرفضني

امجد تنهد:افتهمك بس بويه تصرفك غلط بغلط وهسة لازم وكعت براس ابوك ويواجه المصيبة لوحده والله كاسر خاطري هو هسة شحاله

كرار:ابوي مينخاف عليه ابداً 

امجد:اي وتظن بهيج سالفة سهلة والله انته مصيبة ماتوقعت تسوي هيج بيوم لو امك عايشة جانت ماتت من سوايتك هاي

كرار:الله يرحمها..اسف خالي ورطتك وياي بس والله مالكيت احد غيرك هنا يساعدني 

امجد:هو انته ورطتني بعد ماكدر اعوفك ابن اختي وعزيز عليه ولك كرير

كرار:يعز خاطرك وانه لو ما اعرفك ماجيك تساعدني خالي فدوة رحتلك شلون سالفة العقد يصير بلا وجود ابوها

امجد:خل نسأل ونشوف..ولك كرار بس لا مسويلها شي.مالمستها انته لو شي

كرار:وروح امي ماطخيتها حتى بلمسة ايد وهي خايفة همين اريدها تطمن كضت الطريق كله مناحة وبجي

امجد:طبيعي اذا الي سويتو كله وراه دم وهذا عرض مو شويه كرار مو شويه

كرار:اي اعرف وهمه الجابوها لنفسهم اجيتهم من الباب وبأحترام وعلى سنة الله ورسوله بس همه جبرونه على هالشي

امجد:هسة ارتاح تعبان من الطريق..خابر لأبوك واعتذر منه وخلي يطمن على الاقل ماميت انته..والله يعينه على مابلاه ويحفظه من نار هالسالفة

كرار سكت ومجاوب...وكام خاله كلهم حضرولهم شي ياكلونه...وكرار خابر لأبوه وحاجاه وسداه من شاف عصبيته...

امجد خال كرار الجبير وعمره 46 سنة وعايش بالنجف اما باقي خواله بالبصرة..كلش يحبون كرار همه حتى خالاته هم مزوجات بالبصرة...

خل نرجع لشيخنه نشوف شصار...

كل اهل البنية اجو هجمو على بيت هشام بالسلاح ويهددون بيهم يطلعون كرار وبتهم....

اخوها رفع السلاح بوجه هشام: احسن الكم رجعو اختي الي نهبها ابنكم العار..واليوم نغسل عارنه بيهم ثنينهم

هشام واكف بجمود ولا كأنه سلاح بوجهه:ترفع عليه سلاح وانته بعمر ابني ولك

اخوها:بسبب ابنك العار..اي ارفع سلاح اختي وين طلعوها احسن الكم..ترا افرغ الشاجور براسك انته

ابوها بغضب:ياشيخ مو حلوة بحقك تساعد ابنك بهيج سالفة سمعتنه وسمعتك راح تصير بالطين فأحسن طلع البنية وخلي نصفي حسابنه ونغسل عارنه وابنك العار هذا بعد محد يرحمه من ايدينه

هشام بهدوء:بنيتكم مو يمي وانه مثلي مثلكم متفاجأ بالسالفة وماراضي مستحيل ارضه ابني ينهب عرضكم وياخذها ولو اعرف مستحيل اقبلها حتى لو ماعندي بنات عندي خوات وماقبل على عرضي شلون اقبلها لعرض الناس

طلع ابو هشام وهو اعمى وميشوف:ابني هشام بويه..وراح صار كبال ابنه..حقكم يابه حقكم عرضكم وشرفكم بس احنه ماندري بيهم ومانعرف مكانهم..خلونه نحلها بالعقل مو بالسلاح والدم

اخوها رفع السلاح على الحجي ابو هشام:اطلعوها وغصبن عليكم اليوم اسويها دم للركب يا عارات

هشام عصب:الزم حدودك ولسانك ماعار الا انته رافع سلاح بوجه رجال اعمى..ودفعه هشام بيده هو وسلاحه...

هذاك عصب وحط السلاح كلش براس هشام....

اجو حازم وياه ولد عمه كومة وعمامه وكلهم مسلحين وراح جر هذا اخوها وكفو كل همه ويه هشام

حازم صاح بعصبية:الي يمس الشيخ بشعره خل امه تحضر تابوته هنا..اندفنه بأرضه

اخوان نسمه كلهم هجمو ورافعين سلاحهم وصار رمي من جهتين وختلو كلمن وره سيارته وكلمن بمكان...

هشام صار وره سيارته لأنها بره وياه ابوه وصاح حازم ابوي...وكفو الرمي...

حازم صاح:هشام لا تتحرك من مكانك.....

والبنات يصرخن جوى وهنه يسمعن صوت الطلق وام هشام تلطم وتصيح هشام ولازمتها رقية ماتطلع...وطاحت عليهم من الخوف...

اجن سيارتين ونزل الشيخ حسين من وحدة ورمه يم رجلين ولد اخوه وصاح بغضب وكفو هالمهزلة.....

وحازم نزل سلاحه من شاف شيخ حسين...

راح شيخ حسين دفع ابن اخوه واخذ السلاح منه وشمره واخوه يصيح عليه شتسوي ليش وكفتهم خلنه نغسل عارنه....

الشيخ حسين صاح بوجه ابن اخوه:امشي روح منا..السالفة مو بيد امثالك

اخوها:خليني ياعمي اغسل عاري

الشيخ حسين دفعه:ترادد بعد كلمتي..وصاح..امشي ولي من هنا ماريد اشوف خلقتك ولا خلقة خوانك يالله بسرعة

اخوها:ما امشي من هنا اذا اكتل شيخهم هذا هو وابنه العارات

الشيخ حسين:تاكل تبن عار انته واخوانك وابوك عندي وياه حساب ثاني تهجمون على بيت الشيخ هشام واهله بي جانكم زلم جان لزمتوها مو تهدون بالسلاح وهي جانية وياه..الي يمس الشيخ هشام واهله بأذى احسب منيته اجت على ايدي..يالله امشي ولي من هنا

ابو نسمه بغضب:حسين لا تدخل وادافع عنهم هذا حسابنه وانته خلك بره

الشيخ حسين:اشوف ماتعرف تحجي شنو اطلع منها مو بت اخوي هي..وبعدين منو وصلها لهنا مو انته وتفكيرك التعبان..يابه تنحل بالهدوء...

طبعاً صارت مشاكل وعرايك بين الشيخ حسين واخوه لأن ماقبل على الشيخ هشام....

صارت طلايب وحجي وصياح والناس بيومها عرفت كلشي وانو ابن الشيخ هشام نهب بت شيوخ آل......

وهشام وجهه وشعوره مايتفسرن وكاعد معتزل بديوانه ميريد يحاجي احد ولا يشوف احد حتى عمامه وولد عمه ولا حتى حازم...

صعبة عليه هسة صارت سيرته بكل لسان بعد ما جان صيته واصل لكل مسمع بكل بيت ومعروف بسمعته الطيبة واخلاقه وشرفه وراسه طول عمره مرفوع...

هسة اجه كرار نزل راسه وبهذل حاله واهله واخذ بت العالم وشررد بيها وهسة اهل البنية غضبانين عليه ويردون يغسلون عارهم بدم ميرضون يحلوها بغير غسل العار....

ولو ما شيخ حسين نقذ الوضعية جان كتلو هشام وابوه بحجة غسل العار...بس شيخ حسين مقبل على شيخ هشام لان يعرفه وحييل يحترمه ويعزه ومستحيل يسمح انهم يأذونه بحجة غسل عار وهو ماله ذنب ابنه الي سوه هالسواية....

اما كرار رفضو يعقدولهم لان ماحاضر ابوها او الوصي عليها وهي بكر وغير مستقلة بحياتها بس هو شرحلهم انو هو طلبها مرتين رفضو وهي بالغة....

وهم مايصير يعقد عليها لأن هي مامستقلة وتتدبر امورها..يعني بحالة اذا جانت مستقلة معناها تكدر تصرف على نفسها وتتصرف بحياتها لوحدها مو ابوها هو المسؤول عنها....

بس نسمة ما تصرف على نفسها ابوها مسؤل عنها جان...

لجئو لمرجع ديني آخر يسمح بهالشي يعني تكدر تزوج بدون حضور ولي امرها...كونها بالغة مو صغيرة...

(بنات مو سونها لحد هسة يحجون بالهسالفة الي جاي اكتبها...مهما ضاقت الحال هذا مو حل🥺)

وعقد كرار على نسمة عد سيد من السادة بالنجف وبحضور شهود وخاله وياه..وخلاهم وحدهم بغرفة بس كل لكرار الأفضل انك ماتلمسها هسة انتظر شوي...كلشي يصير هنوب خاف يلكوكم ويعتقدون انته ماخذها قبل العقد...عاد الأفضل تبقه طاهرة هسة...

كرار كله صار خالي انته افهم مني بهالأمور...

وابوه يتصل عليه ومغلق يريد يعرف وينه بس...

حوراء كلش كامت متطلع شبر من البيت وحتى المدرسة تركتها وابوها غصبها ترجع المدرسة كلها كملي بس هالسنة على الأقل..رغم غيابها الكثيرة رجعوها بسبب شطارتها..هالحجي بعد فترة من غيابها رجعها..ويلاحظها تخاف من خيالها وتتحلم...

تروح المدرسة والخوف يسكنها وترجع كله ويه البنات متعوفهم جانت تنفرد عن الكل بس كامت ترجع كله ويه البنات وكامت تلاطفهن وتحاجيهن بس حتى ترجع من المدرسة وياهن وهنه مستغرباتها...

متريد هذا العار ايمن يتعرض الها مرة ثانية...

مرات تباوع للمكان الي نقذها بي هذا الشخص الي ماتعرفه ودوم تحلم بي..تقريب كل ليلة تشوفه بحلمها وتحسه ملاك مو بشر وتكول حتى من اجاني بالواقع هاي جان ملاك من ربي نقذني بي...

تتمنى لو جاي هل الملاك من زمان الها ونقذها من هذا العار وتتمنى لو جاي من جانت بعمر ال11 سنة بذاك المكان الي تسبب بحالتها هاي.....

ابوها شكثر يصيح على امها ويكلها بتج بيها شي وانتي غافلة عنها وماتدرين بشي..تكله كلشي مابيها ليش تكبر الموضوع خل تكعد بالبيت احسن الها من المدرسة...

برغم همومه وسالفة كرار الي اخذ بتهم وشرد..بس ماحب يصير عداوة وكره بين العائلتين لأنه يعز هشام حييل ويحترمه وميريد مضرته ابداً لذلك راح يسون كعدة فصل ويفصلونهم فلوس احسن من المشاكل...

الشيخ حسين لبس محبسة واخذ سبحته وتحضر تعطر..برغم كبر سنه هيبته حلوة وشكله حلووو وجهه كله سماحة وقار...

هو اكثر اخوانه طيبة وحكمه واعدلهم هو واخوه ابو عباس اما باقي خوانه كل تفكيرهم مادي ومحدود ومتعصبين بكلشي ومتشددين ويه اهلهم وهو هم عصبي وكت الجد وعنده الحق حق والباطل باطل...

ملاحظة ابو حمزة هو نفسه الشيخ حسين ابو حوراء خاف نسيتو...

طلع وعبر على غرفة بناته وسمع بته آية تكل لأختها حوراء...ولج ليش هيج تغيرتي حوراء شبيج...

وشوي سمعهم يحجن بسالفة نسمة وشردتها...

آية:تدرين العشيرة كلها محتركه وعمي ابو سلام متحلف بنسمة يكتلها كتل خلاص والله خايفة لا تصير حرب دم

حوراء: تدرين شتمنه كون فد عشيرة يجون ياخذوج فصلية ونخلص من كركتج..لا ليش فصلية كون هدية لفد واحد مخبل مثلج

آية:اسم عليه جبح احلامج مال مقابر يمه اعوذ بالله بربج اكو وحدة تتمنه لاختها تصير فصلية لو هدية عابت هالخلقة..مباوعة لنفسج بالمراية انتي.. بحواجبج وعبوسج تشبهين شيخ شاكر الشايب

حوراء دفرتها برجلها:وانتي تشبهين سالم ابو الخضرة

آية:ههههههههههه منو سالم ابو الخضرة

حوراء:زوجج المستقبلي..كومي ولي من خلقتي مو اشبه شيخ شاكر شعندج يم وجهي....

ابو حمزة دك الباب ودخل على بناته:شلونهم الحلوات

حوراء وآية:هلا بابا تمام

آية:بابا راح تروح تحاول تحل سالفة نسمة موو

ابو حمزة:بابا هالأمور مو بكدج وتحجين بيها..بس اي رايح اشوف حل للمشكلة..بناتي اعرفكم ومربيكم عدل ماتسوها..ونسمة غلطت غلطة ماتنغفر دير بالكم تغلطون نفس غلطها تره ماراح تلكون اهلكم بعد ولا تلكوني رحوم ويه الغلط..واهلكم همه جنتكم وناركم اهم من الكلوب وهواها

حوراء حست بغصة جبيرة وتتمنه تموت ولا يعرف ابوها بتحرش ايمن بيها وهيج بالشارع وكدام الوادم ونقذها رجال غريب...

ابو حمزة ابتسم بوجه حوراء:حوريتي ساكته شبيها

آية طفرت:تدلع عليك بابا صايرة كلش دلوعة

حوراء:مابيه شي بابا والله مادلع كلشي مابيه

ابو حمزة ابتسم:اي مو كلمن يرى الناس بعين طبعه

آية:يعني انه دلوعة زعلت عليك بابا..صدك زعليت

ابو حمزة:عوفي الزعل وكومي روحي لأمج اريد احاجي حوراء بسالفة

آية:صار بابا...وطلعت..وحوراء كلبها نخبص خوف شسامع ابوها ويريد يحاجيها...

حوراء بخوف:خير بابا صاير شي سامع شي

ابو حمزة بتسائل:ليش اكو شي صاير انه جاي اسألج شبيج بويه مو عاجبني حالج فجأة عفتي المدرسة وانتي شكد تحبينها وتكولين ماعوفها وجنتي تكولين اجيب معدل عالي بابا تخليني ادرس واعدتج افكر بالموضوع مع انو ما عاجبني ترحين الجامعة بس كلت اذا جابت المعدل الي كالت عنه اخليها تكمل بتي واعرف تربيتها..كليلي بابا احد متعرضلج بطريق مدرستج اخليلج سايق مو مشكلة

حوراء خافت وبدت الرجفة تتسلل لرجليها:لا بابا مابيه شي والله محد متعرضلي ولا شي..وحتى صار عندي صديقات هسة

ابو حمزة:متأكدة كليلي واكسر خشمه الي يتعرض لبت شيخ حسين امحي حتى غباره

حوراء:لا لا بابا متأكدة واعرف انته مهتم وخايف عليه بس لتفكر انه بخير..لا تتأخر عالزلم

ابو حمزة كام:اي الله كريم نتحاجه مرة ثانية.. ما مقتنع مابيج شي..يالله اروح اشوف مصيبة بت عمج كل يوم واحد مسويلي مصيبة من ولد عمج والبلاوي كلها على راسي

حوراء:بابا لا تكره نسمه هي خوش بنية مستحيل تغلط هيج غلط بس اكيد هذا لعب بعقلها

ابو حمزة:بابا هي مو مسألة كره انتي ماتفهمين هي غلطت غلطة جبيرة يابويه جبيرة تعرفين الي تاخذ رجال وتمشي وياه شنو بنظر الناس..سمعتها وسمعتنه صارت رماد وكل الي حصدناه بسنين باعته برخيص..والله المصيبة على راس الشيخ المسكين الي ابنه سوه هيج هسة راح يكسر ظهره الفصل اكيد عمج الطماع مايرضي شي..والسالفة مراح تبرد مو هينة..راح احاول متصير مشاكل ولو العداوة اكيدة بينه وبينهم هم مو شويه

حوراء تدري دوم يحجي على عمامها ابوها متعلمه:بابا انته عادل وتعرف العدل واثقين بقرارك انته تهدي عمامي والناس

ابو حمزة:كومي كعدي يم امج وخالاتج لا تكعدين بحدج...

هزت راسها بأي...وطلع ابوها...

نروح يم شيخنا نشوف شمسوي...

كاعد يتأمل بالفراغ وايديه على راسه ويفكر بأبنه الوحيد الي كسرة هالكسرة وكص وجهه كدام اليسوة والمايسوة...

طلع صورة ابنه من المجر من هو صغير..غمض عيونه وذب حسرة قوية..وكال شفتي يافرات ابنج شسوة بيه..عود هو دكتور ودارس وعاقل وربيته وتعبت عليه تاليها هيج وسمعتي تلطخت بالطين..شخله للماتربين

رجع الصورة وكام لبس شماغه وعكاله وكف بثقة كدام المراية وهو يعدل عكاله..لبس محابس العقيق وشكل كبكات البصمة وتخيل فرات هي تشكلهن وتبتسم اله...

وتردد اله كلمات تشجيع انته كدها ياشيخ طول عمرك مهيوب ومحد يمسك بكلمة وسمعتك ورقة بيضة محد يكدر يلطخها...

طلع من الغرفة وصارت بوجهه إيمان.......يتبع