البارت السابع
ابوه ماقبل ينطي التلفون..انتظر ابوه يطلع وراح دخل غرفته ودور تلفونه ولكاه حاطه بالمجر مالت امه...باوع للمجر وليهسة ادويتها واغراضها بمكانها ممتغير شي...
ابوه تاركهن مثل ماجانن ومشايل اي شي نفس ترتيبها وغراضها..راح فتح الكنتور وملابسها بعدها موجودة وريحت عطرهن خله عيونه ادمع...
اخذ قطعة من ملابسها وشمهن بكل لهفة شوق وحب..وعيونه طاحن دموعهن ومسحن...
كرار بعبرة:يمه مشتاقلج والله مشتاقلج وحق رب السمه خليتي فجوة بروحي ورحتي..غربة بدونج وطن..حتى ابويه شكله يحس بالغربة بدونج..وابتسم بدموع..ظنيته نساج وعاف ذكرياتكم بس كلشي موجود هنا...اخخخخخ يمه ياريتج موجودة هسة لو ترجعين اعوف الدنيا كلها يم رجلج..حظن ملابسها وشماهن حيييل ودخل عطرهن لرئته بعمق...
رجع ملابسها وراح للمجر نفسه وشاف صورتها هي وابوه شايلينه من هو صغير ثنينهم واحد واكف بصف الثاني..شكد جان اشكر وحلوو..ضحك عالصورة لان هو بلا ملابس كلش وشكلهم فرحانين بي امه وابوه....
بجه بجي على صورتها وحضنها حييل لصدره...كام عاف الصورة واخذ المبايل وطلع...
راح بره البيت وخابر اختها..ردت بسرعة ونسمة الي جاوبت وكأنها تنتظر مكالمته من زمان...
نسمه تحجي بهمس:الوو كرار حبيبي فدوة مشتاقتلك
كرار:نسمه..بعد روحي وانه مشتاقلج
نسمة:كرار هاليومين زواجي من ابن عمي ابوي راح يزوجني اياه بنفس يوم العقد وغصبن عليه.منعني من الدوام واخذ تلفوني اكلت كتله من اخواني بسبب التلفون عرفو احاجيك....و.....
كاطعها كرار:نسمة سمعيني عدل الي راح اكوله اذا انتي جبانة ومتردين تضحين لحبنه ومتسويها فمن هسة خل نودع واحد الثاني والله يوفقج ويه ابن عمج
نسمة:ولك شهل الحجي كرار اتنفسك هوى ومستحيل اصير لغيرك تفهم مستحيل
كرار:لعد حضري نفسج الليلة الجاية واي شي لتاخذين بس حضري نفسج وطلعيلي بالليل اخذج ونروح للنجف ونزوج انه وانتي هناك خالي و....
نسمة كاطعته:لاء كرار لاء ماكدر اسويها واغدر اهلي..تدري هاي وراها موتنه ثنينه وبيها غسل عار تعرف شجاي تكول وشجاي تطلب مني انته صاحي
كرار:اي اعرف شجاي اكول ومو صاحي لاء..ماكدر اشوفج تزوجين غيري..كتلج اذا مو كدها وتخافين خل نوكف هنا وكلمن بطريق..لان هاي الطريقة الوحيدة حتى نكون سويه
نسمه:لا ماسويها انه جبانة اي بس ماكدر اتخله عنك كرار اموت نفسي اذا صرت لغيرك
كرار: حبيبي سمعيني نروح النجف يم خالي هناك هو يساعدنه ومستحيل ينطي بيه ماراح يلكونه صدكيني امشي وياي وربج يحلها..اخذج بالحلال مستحيل اطخج من غير زواج بس وثقي بيه
نسمة بخوف:كرار احبك واثقة من عندك
كرار:لعد حضري نفسج..حاولي تجيبين اوراقج ومستمسكاتج خوش انه اخابرلج واكلج بيش ساعة تطلعيلي بعذر من يمج هاي بعد....
سدته من كرار وهي ترجف خوف ورعب من الي ناويه عليه وكلت لأختها ورزلتها وكلتلها لاء صخام بوجهج تصخمين الوضعية اكثر...
مصيبة هاي..كلتلها ماعليج بس لحد يعرف اذا كلتيلهم يموتوني مو يزوجوني هل مرة...
قنعت اختها بالكوة تساعدها ومتحجي لأحد وكدرت تاخذ مستمسكاتها من امها بدون ماتحس...
حضرت الها جم شغلة بجنطة ايدها وحطتهن هنه وعباية برة وظمتهن بالحديقة حتى بالليل تطلع ومن يجي تاخذهن وتفتح الباب وتمشي...
واجت ليلة المصيبة ونسمه بطنها ومعدتها توجعها ومتخربطة من الخوف والرعب الي بيها على الي ناوية عليه....وكل شوي تكول لا ماسويها يكتلوني اهون من انو ينكال عني عار بين الناس وشردت....
وترجع تفكر بكرار وحبها اله تعشكه بجنون متكدر من غيره وهم متكدر تعوف اهلها ويه هالمصيبة...
كاطع تفكيرها صوت اختها تكلها نسمه رجعي داخل كافي خبال والله يموتونج وميرحمونج...
نسمة ترجف خوف:اجه كرار مو
اختها ببجي:ولج نسمة ماريد تموتين رجعي
نسمة ميته رعب وهاي تزيدها عليها:احجي قبل لا يطلعون اخواني او احد..اجه كرار مو
اختها تبجي:اي هو واكف بره دزلج رسالة
نسمة حضنتها بدموع:ديري بالج على امي لتخليها تنقهر ماشي..احبج اختي بعد كلبي...وحظنتها ودعتها بدموع...
خذت اشياءها نسمه ولبست عبايتها وطلعت ركض وهي كلبها يدك طبول حرب من الخوف والرعب ومتعرف شلي فكرت بي...
بس همه الي وصلوهم لهل الحد هي تحبه لكرار وهو همين وطلبها مرتين ورادها بالحلال بس همه معاندين...
وبعدين لا بي عيب ولا شي يخليهم يرفضون نسبهم...
وهي خطية منعوها من الدوام واخذو تلفونها منها لان عرفو تحاجي كرار...
صعدت السيارة بسرعة حتى محد يشوفها الساعة بال1 بالليل...
كرار حرك السيارة بسرعة وكلها بوشي وجهج وهي هنا تفجرت بالبجي وظلت تشهك...
اخذها وطلع من الديره وهي بعدها تبجي....
وكف السيارة بمكان والتفت عليها وهي تبجي بصوت...
كرار:نسومه حبيبتي لتخافين مادامج وياي انتي..يالله كافي بجي لازم نلحك نمشي حتى قبل ميفقدونه..انه هم تركت اهلي وابويه الماعنده غيري علمودج
نسمة ببجي وشهكات:كرار فدوة رجعني وحاول تقنع ابوك يساعدنه عمي يحبه ويحترمه اكيد هم يساعدنه فدوة رجعني
كرار:ماراح يقنع ابوج ابداً جان قبل من خطبناج مرتين..و وصلنه مكان مانكدر نرجع يبت الناس..مسحي دموعج وكافي بجي يعمري ورانه طريق...ولزم ايدها وهي ترجف سحبتها منه والرعب ماخذها اخذ...
مشه كرار وهي دموعها مابطلت...
طبعا ايمان شايفة كرار طالع بسيارته نص الليل وراحت كعدت هشام وعمتها وكلتلهم كرار طلع بالسيارة بالوحدة....
وهشام من ساعتها فزع وكلبه مخبوص وكال السويج شلون اخذه انه حاطه ويه الفلوس وراح فتح خزنة الفلوس ما شاف السويج وشاف مأخوذ من الفلوس هواي....
ولزم راسه ويكول..كرار راح يجيبلي مصيبة ودك عليه مغلق وكلبه صار جمر وميعرف شيسوي وين يروح..شمر التلفون على السرير وخذه سويجه ورجع لتلفونه...وراح صعد سيارته...
وخابر على حازم...وخطية كام مفزوع من نومه وبس شاف رقم هشام رد بخوف بهالساعة ويدك عليه هشام اكيد صاير شي...
حازم رد:هاا ابو كرار خير شصاير
هشام بحيرة:حازم كرار طالع بالهساعة مو يم ابنك
حازم كام وطلع من الغرفة:ماعرف ليش شبي كرار..وراح لغرفة ابنه شافهم نايمين ولده كلهم..هشام ولدي كلهم نايمين
هشام حط ايده على راسه:يالله..حازم كرار حاسه سوالي مصيبة الحكني ياخوي
حازم:بسم الله شبيك اهدا مصيبة شنو
هشام:هذاك اليوم متهجم على بيت الناس مو بعيدة يسوي اكبر من هالمصيبة والله صاير معرف تربيته..تغير هالولد وساب..ماخذ سويجه وانه مانعه من السيارة وماخذ مبلغ من الخزنة ماتصدك لو اكلك شكد..ماعرف شيسوي بي فهمني اكيد ناوي على شي هسة وين الكاه
حازم:اهدا هسة جايك وين انته....
كلاله رحت اشوفه وين وكل الامكنة الي يروحلها مالكيته وتلفونه مغلق والمبلغ الماخذه يتقدر بال6 ملاين...
حازم وهشام ماخلو مكان ماراحلو وهشام حافظ ارقام جماعة كرار واحد واحد يمه لان يخاف على ابنه...
واتصل عليهم ومو يمهم هو ويأس وراحو البيت هو وحازم وينتظرون ويشوفون شيصير وكرار ماكو وصار الصبح وهشام كلش تلفانة اعصابه...
وحتى امه وابوه قلقين عليه بعد ابنهم ماعنده غير هالولد ويخافون عليه وهو كبره بماي عيونه ويباوع لطوله...
هشام كاعد بأعصابه:حازم شتتوقع كرار شيسوي بهيج مبلغ وين رايح
حازم يعرفه يحترك على ابنه خوف:هشام اهدا وخلينه ننتظر شوي يمكن مطلوب او احد طالبه منه مو معقول كرار ياخذ هيج مبلغ يسوي غلط بي وانته مربي....
كاطعه هشام بعصبية:لا تخبلني شمطلوب وشنو مطلوب 6 ملاين وشنو ناقصة ماخذاه حتى يتداين من احد وهو شيريد يجي عنده
حازم تنهد:والله ماعرف بس لابد يبين مادام مابي شي ولا مسوي حادث لابد يبين....
حازم بقه يهدي بهشام وهو هم كاعد على اعصابه...
ايمان كاعدة يم رقية وعمتها:اكيد كرار راح اخذ بت الناس وشرد بيها ومصيبة ما اكبرها من مصيبة لهشام ويا ضيعت الهيبة والسمعة كدام الناس لو صدك ناهب بت الناس واهلها شيوخ ميسكتون مو ناس بسيطين
ام هشام التفتت عليها:وانتي منين جبتي هالسالفة هسة شنهبه شتخربطين ولج تعرفين كرار وين وماتحجين هااا احجي ولج
ايمان:اني ماعليه شبيج عمه كبيتي بوجهي كلت يمكن..يعني انه سمعته يحاجيها امس واستغربت منيله تلفون وابوه مانع عنه التلفون كلت اكيد شباب ومايكدر عليه ابوه واكيد يجيب تلفون منا منا..انوب ماتاب منها بكوة طلع من المركز خزه ابوه هالولد شكد صاير جامح
ام هشام لطمت وجهها:عزززااا بعينج هاي كله وساكته ماتحجين..شحجه وياها ولج
ايمان:وانه شعرفني هيج السالفة هو جان يكلها انتظريني اجيج وما سمعت الباقي اجه هشام ورحت استقبلته..وشفته طلع لأبوه كذلك ماكدرت افتن عليه واكل لأبوه عن التلفون..حتى تكولون احركه يم ابوه
ام هشام:اي كلش طيبة انتي...ولك كرار عزززااا بوجهي وصخام ولطام لو مسويها صدك ويا مصيبتك يا هشام هو ناقص عمايل تعبانة ياربي لطفك بينه
رقية:يمه ماعتقد يسويها كرار عاقل ميسوي هيج مصيبة لابوه اعرف هو يمكن عنده اسبابه راح يجي ويحجيلنه اكيد
ام هشام عصبت:كومي انتي من يمي شنو كاعدة بصفي..والتفتت لإيمان..وانتي كومي شوفي جهالج..نص المصايب سببها انتي اكص ايدي اذا ماتعرفين كلشي انتي
ايمان كامت:اي وانتي كلشي يصير تشمرينه براسي حتى لو تتعاركين ويه رقية انه السبب..شبيج تغيرتي عليه عمه
ام هشام:امشي روحي مو ناقصتج انه كلش ظغطي راح يصعد.....
دك تلفون هشام وشاف اسم كرار رد بلهفة وخوف:كرار وينك انته شنو بيك
كرار:مابيه شي
هشام بعصبية:شلون تاخذ السيارة وانه حارمك منها وين انت هسة وليش ماخذ هالفلوس شتسوي بيهن كلي بس لا سويت الي ابالي كرار
كرار:اسف بويه خابرتلك حتى اعتذر الك وسامحني..انه احبك بويه..نسمة راح تصير مرتي
هشام بعصبية:لك شتعتذر شسامحك..هسة ترجع وين ماجنت وترجع بت العالم ولك شجبتلي وجبت لنفسك غبي بس تفكر بكلبك مافكرت بعقلك
كرار:اسف ماكدر ارجع بعد..سامحني انته مالك ذنب بشي...وسداه...
هشام طار عقله ورجع اتصل وهو يصيح ويحجي على كرار..بس غلق الجهاز كرار...
هشام شمر الجهاز من ايده وتكسر وصل ولزم راسه:ولك حازم مصيبة وطاحت على راسي كرار ماخذ بت الناس وراح ماعرف وين..يكول يريد يتزوجها ياطركاعة الطاحت على راسك يا هشام
حازم تفاجأ:لااااا ميسويها كرار شصارله..يالله.. شراح تسوي هسة وين ممكن يروح ماعنده مكان هو
هشام بقهر:شعرفني والله ماعرف شصارله مافكر بينه ولا فكر بهالمصيبة..حازم هاي السالفة وراها دم.. تفهم ناهب بت الناس وراها طيحت عكل وروس وشرف جوى الرجلين..يعني وراها دم وغسل عار
حازم كام:يااا بويه شراح نسوي هشام اذا عرفو اهل البنية راح تصير بالسلاح هسة..وينه سلاحك حضره
هشام لازم راسه:لااا ياحازم لااا ماريدها توصل هيج خل نفكر بهدوء نحاول نحلها بهدوء ماريد تصير دم بسبب ابني الغبي....
بيبيته سمعت وظلت ادك وتطلم وتبجي ورقية تهدي بيها وخايفة حييل وكلهم صارت بيهم الخوفه ومدري يا ساعة اهل البنية يجون هداده عليهم....
ايمان كل شوي تحجي حجاية شكل وكل شوي تكول شي تخلي ام هشام اتشيط عصبية وتظل تلطم اكثر...
لمن زمخ بيها هشام وسدت حلكها بعد مفتحته...
سمعو صوت الرصاص ودك الباب والهوسة وصياح.....
بالجهة الثانية...
كاعدة بالبستان وحاضنه رجليها وفجأة تذكرت هي ماتجي لهنا بس شلون كامت من فراشها واتجهت لهنا...
هنا اكثر مكان تمقته وتكرهه..باوعت للمكان هدوء كئيب مابي غير ريحة مووت ومصايب...التفتت وكامت وتباوع للمكان كله هدوء....
هنا المكان الي صارت حادثتها الموجعة..لمست الجرح الي بفخذها وكأنها رجعت بنت ال11 سنة لزمت كلبها بألم ورفعت راسها للسما...
نزلت وجها والتفتت على صوت غريب...
شافت شي تقدم ناحيتها خافت رادت تشرد بس شافته فرس يجنن ولونه جوزي وشعره يخبل ونظيف بس بدون سرج...
استغربت شلون اجه هنا وحده وشلون عابر سياج البستان..ضحكت وقليل ضحكتها تنسمع وراحت لزمته وظلت تمسد على شعره...
وهو كأنه يعرفها ينفخ بوجها ويسوي حركات بحلكه..ظلت تضحك من كلبها وبوسته بين عيونه...
فجأة سمعت اكثر صوت تمقته وتكرهه واكثر صوت يسببلها رعب..التفتت شافته هذا العار الي عود هو ابن عمها...
خافت وتراجعت ليورى والرجفة تسسلت لكل انحاء جسمها وتريد تشرد لزمها وصرخت بعلو صوتها....
فجأة شافت شخص اجاها بس ما مبين وجهه ولا تكدر تشوفه ملثم...نفسه هذاك الشخص لابس دشداشة...
بس هالمرة لابس حزام مسدس وعيونه تجدح نار من الغضب ولزم ايمن العار وطلع سلاحة وحطاه براسه...
وماسمعت غير صوت الطلقة والدم تطاير وفزعت من جسمها روحها...
وفزت من كابوسها على صوت آية تكلها حوراء ولج كومي صارت مصيبة.......يتبع
ليست هناك تعليقات:
إرسال تعليق