هدية الشيخ هشام

البارت الثالث

بعد جم يوم هشام اخذ من عمامه ثنين..وحازم ذراعه اليمين..وعزام اخوه وراحو على بيت الشيخ حسين....

استقبلهم الشيخ حسين ابو حمزة...

الشيخ ابو حمزة:ياهلا ومية هلا بالشيخ هشام..شرفتنه ياشيخ

هشام:الشرف الي يا ابو حمزة شخبارك.....

خل نروح داخل البيت...

ام حوراء:ولك علي منو عد ابوك

علي:مادري بس شيوخ جاينه

ام حوراء:اهاااا روح اكعد يمهم شوف شنو صاير

علي:يمكن جاين يخطبون حوروو وحتى نخلص من جهرتها

حوراء سمعت هيج وضاجت:اكل تبن هسة اشك حلكك الك واكل لبابا والله

علي:وليش شكايل صخونة كون

حوراء كامت وخذت كتبها ودخلت لغرفتها هي وخواتها....

ام حوراء:ولك صدك هذول الشيوخ خطابة

علي:شعرفني انه اشاقه ويه حوورو

ام حوراء:طاح حظك عبالي صدك خطابة..مثل امك دوم تسبق الاحداث...

بالديوان...

الشيخ ابو حمزة:والله يابو كرار نتشرف بنسبك وين نلكه ناس ذهب مثلكم

هشام:والنعم منك تسلم يا ابوحمزة والشرف اليه والذهب اصلك

ابو حمزة:وانه اروح بنفسي وياكم اخطبها الكم

هشام:تسلم ياشيخ على راسي والله...

اخذهم الشيخ ابو حمزة لبيت اخوه...لأن الي يريدها كرار تصير بت اخو الشيخ ابو حمزة...

راحو لبيته واستقبلوهم بالترحيب...

وفاتحوهم بالسالفة وكلولهم هيج وهيج وشارين بتكم وشيخ ابو حمزة حمد بأخلاق هشام وابنه....

ابو سلام:والله ياشيخ جيتك على عيني وراسي..ويشرفني نسبكم...وماعرف شكلك بس كريمتنه ابن عمها يريد يعقد عليها قريباً..والله خجلان منك ياشيخ

كرار انصدم وماعرف شيكول وباوع لأبوه...

هشام حس بي:يسلم راسك..احنه نعتذر حيل ماجنه نعرف كريمتكم لابن عمها..احنه جينه على عرفكم وكلنه مانلكه احسن منكم

الشيخ ابو حمزة صار اصفر من الخجل من رفض اخوه وهو جذاب مامحجوزة لأي واحد من ولد عمها مستحيل مايدري هو....

الشيخ ابو حمزة ماعرف شيكول:اعتذر منك ياشيخ ماجنت اعرف كريمتنه رايدها ابن اخوي..اعتذر

هشام:شهل الحجي ياخويه لتعتذر

كرار انقهر كلش:عمي احنه جاين ورايديها وشارينها وشتريد حاضرين

ابو سلام:ارجع اعتذر ياشيخ..اعذرنه

هشام:بويه هذا هو شهل الحجي احنه الي اسفين لا تعتذرون احنه ماجنه نعرف....

اعتذرو وطلعو والشيخ حسين شكد اعتذر من هشام حيل على حطه بهل الموقف...

طلعو وراحو كلمن لسيارته..كرار صعد ويه عمه عزام...واول ماوصلو للبيت نزل كرار واتجه لأبوه توه نزل من سيارته حتى الباب ماسداه...

كرار:بويه والله ما محجوزة البنية وهذا ابوها واحد نصاب مايريد ينطينه بته

هشام:وانته شعرفك البنية ما محجوزة

كرار:جان كلتلي..مستحيل تجذب عليه

هشام:لحظة لحظة شنو تجذب عليك ليش انته تحاجيها..يعني عندك تواصل وياها

كرار:اي بويه وصار اشهر احاجيها وهي ما محجو....

كاطعه هشام بعصبية:وشلون تحاجي بت الناس..ترضاها  لعمتك لو لوحدة من اهلك هااا

كرار:يابه والله ماعندي شي وياها مجرد حجي بأدب حتى مشايفها غير بالكلية

هشام بعصبية:بعد ويريد يطلع ببت الناس حتى نصير سالفة بيد اليسوة والمايسوة ويسويلي مصيبة

حازم:ابو كرار اهدا ياخوي

عزام:اهدا ومايستدعي كل هالعصبية

هشام بعصبية:شهدا شتكولون..ماسمعتوه يحجي ويه البنية واهلها ناس محترمة..يريد يسويلي مصيبة ويه اهلها..طايش ويريد يتزوج

كرار مارد وترك ابوه وراح صعد سيارة ابوه لان بعده بيها السويج وهو معصب وابوه يصيح عليه يرجع ماخلص حجي مالته...

راح بالسيارة وهشام صار كلش عصبي بكوة مهدينه عزام وحازم...

دخلو داخل البيت....

كرار وهو يسوق اتصل على حبيبته الي خطبها توه...

اسمها نسمة ردت:الوو كرار انته....

كاطعها كرار بصياح:شلون تجذبين عليه وماكتيلي انتي محجوزة لأبن عمج هاااا شلون تخليني بهالموقف

نسمة:وحق الله ما محجوزة لأبن عمي وماتوقعت ابوي يرفضك والله العظيم..اصلا مادري رفضك اجه وكلي انتي لابن عمج منا وهيج..والكعبة تفاجئت وكايل لأمي رفضتهم

كرار بعصبية:يعني شنو يريد ابوج بالظبط ماتكليلي..كناله شتآمر حاضرين..لج وعلي جيت احط طلقة براسه وبراسج من كال لأبن عمها

نسمة:والله ماعرف..والقرآن مستحيل ازوج غيرك كرار تعرف شكد احبك..اتنفسك هوى مستحيل اكون لغيرك

كرار:وانه ماراح استسلم وراح ارجع اطلبج من ابوج مرة ثانية..هسة مو وقتها خل تهدأ الامور واحاول اقنع ابوي يرجع لأبوج..ولو ابوي اعرفه كلشي ولا كرامته..والله اذا مصارت ما ايأس ابداً......

بيت الشيخ حسين....

رجع لبيته وهو معصب من اخوه طبعاً بعد ماراح شكد حجه عليه وكله شلون ترفض ابن الشيخ هشام وتعرف وين صيته واصل وشكثر معروف بأخلاقه الطيبة...

كله بتي مانطيها غير ولد عمها...سكت عنه ابو حمزة وراح لبيته...

حوراء شافت ابوها معصب راحتله ودتله ماي..وخايفة صدك خطابة جاين لأبوها لأن تدري بس هي البنية الجبيرة عد ابوها الكبار تزوجن والباقيات اصغر منها...

حوراء:بابا خير ليش معصب

ابو حمزة:ماكو شي بويه روحي صيحي على امج خلي تجيني

حوراء:صار بابا..راحت صاحت لأمها وراحتله...

حوراء راحت للغرفة وظلت تحوس وخايفة حيل يكونون خاطبينها وجاي يكل لأمها عن السالفة...

ظلت تحرك بروحها حرك....

شوي واجت امها وهي سألتها شراد ابوي منج كلتلها ماعليج...

حوراء سكتت وراحت اخذت ملابس وراح للحمام تسبح...نزعت ملابسها وتريد تفتح الماي دخلت اختها الي عمرها 13 سنة حوراء صرخت واختها طلعت بسرعة وسدت الباب....

حوراء صاحت:وعمه حتى عمه تجين وتجفتين

آية:هههههه عابت غير انتي خاله الباب مفتوح مامقفول

حوراء:وحمس حتى حمس..ماتعرفين ادكينه يمكن اكو حيوانة جاي تسبح هنا

آية:ههههههه اي ماشي هالمرة ادكه..بس شفت كلشي عندج خخخخخخ

حوراء:ومرض هم تضحك السفيهة الماتستحي

آية:ههههههه انتي تسوين نفسج مضحكه..بس طلعن غراضج نفس غراضي ههههههههاي بس الرمانات صغار ولج الله يعينه الياخذج

حوراء:عزززا طاح حظج ادبسزز..امشي ولي منا لا توكفين بالباب انكلعي تره اطلع الظيم بيج

آية:اي فهمنه لا تعصبين وحتى الي عندي طلعن اكبر منج ههههههه

حوراء:طاح حظج اي والله انتي متأكدة عمرج 13

آية:لا صايرة قبلج واهلي جذبو عليج ههههههه..اكول حورو هاي شنو الجرح الي بفخذج ليش هيج باقي اثر

حوراء باوعت للجرح واذكرت من دخل غصن السدر بفخذها...

غمضت عيونها حييل ورجعت للذكرى المؤلمة وكأنها تصير هسة كبالها...نزلت دموعها بحسرة وألم...ومسحت دموعها بسرعة...

حوراء:وين شفتي الأثر

آية:شفته توه..هاي وين متأذية ولج

حوراء:هاي مرة من زمان امي ضربتني واذتني بغير قصد

آية:جذابة امي تضربج طراكات ايي بس ماتضربج بشي قوي وحاد هاي ضربة قوية بشي حاد مضروبه انتي

حوراء ضاجت:ماشاء الله دكتورة آية سويتيله تحليل واختبار..انجبي وانكلعي

آية:مانكلع لعد راح اكعد بالباب

حوراء:هسة شتردين انتي

آية:خلصيني اريد اسبح يالله خلصي بسرعة

حوراء:اي بس لتظلين لازمة الباب لتكول واكفة على كبري يوم اربعينيتي

آية:عيييع حتى هنا بالحمام الي تحضره ملائكة شكد متشائمة ماكو تفائل ابد..معقده

حوراء:آية ترى البس الملابس واطلعلج

آية:خوفتيني والله..امداج...وراحت عنها....

نرجع لبيت شيخنه...

كرار رجع للبيت وصار ابوه بوجهه...

هشام بعصبية:شلون تعوفني وتمشي وانه احاجيك هاااا صاير ماتحترم اشوف

كرار:اسف بويه بس انته اكثر واحد تعرفني وانه تربيتك حتى لو حاجيتها للبنية بس ابد ماقللت ادبي او تجاوزت....

كاطعه هشام:ولك انته ماتفهم شنو عرض الناس يعني لو ابوها لو اخوانها عرفو بيك تحاجيها شراح يكون موقفهم وموقف البنية..هذا عرض ناس تفهم لو لا

كرار:يابه احبها والله احبها واريدها بالحلال ماردت اكمل وياها هيج بالتلفون ردتها بالحلال بس شسوي لأبوها مانطاها بس ماراح ايأس وغلاتك يابه ماتاخذ غيري ابداً

هشام:استغفر الله ربي واتوب اليه..هذا راح يسويلي سالفة..اعرف طيشك هذا راح يسويلي مصيبة..بويه خطبناها وماقبل ابوها حتى لو مو محجوزة لأبن عمها بته مو نصيبك ابوها مارضه بته وحر بيها مايريد ينطيها الك افهمها

كرار:لا والله وحقك ما ايأس وارجع اطلبها لمن غصبن عليه يقبل

هشام بصياح:انته ماتفهم اكلك ابوها رفضك..اروح اتوسل بي مرة ثانية حتى ينطيها الك..اسمعني عدل كرار اذا ماتعوف بت العالم وتنسه سالفة الخطبة بعد ماحاجيك ولا تحاجيني افتهمت..الي خلقها خلق غيرها

كرار بصياح:والله ولا اعوف هالبنية وماترهم لغيري ولا ارهم لغيرها

هشام:تعلي صوتك بوجهي يا ابن ظهري..ياحيف عليك..انته ترباة ابو هشام..بس ياحيف عليك

كرار هدأ:آسف بويه ماقصد..وباس راسه..وحقك انه فقدت اعصابي..بويه رايدها للبنية وهي مو من البنات الخفيفات والله بت اصل ومتربية والحجي بالتلفون هاي حاجيتها عن طريق كروب بالكلية وحجيت وياها اكثر من مرة..يمكن تكول مراهقة يمكن تكول طيش بس حبيتها اول ماشفتها..هي نفس قسمي...وماعندي شي وياها غير السؤال والكلام العادي

هشام:وانه شبيدي عليك اذا ابوها سمعته كال لابن عمها وماكدر اروح اطلبها مرة ثانية الك مو حلوة بحقنه ولا بحق اهلها..كال بصريح العبارة لأبن عمها يعني رفض نسبنه

كرار:خلي تهدئ الامور ونشوف شيصير والله كريم

هشام:الله كريم..شعلت بدمي نار تدري

كرار:اسف مرة ثانية

هشام:مسامح بس لا تعيدها افتهمت

كرار:صار يابه..افديك بروحي انه

هشام:اسم الله عليك..انه شرايد غير سعادتك.....

مرت جم يوم وكرار ما يأس وبقه يحاجي نسمه ويريد يطلبها مرة ثانية وتكله لا تجي هسة ابوي قافل على سالفة انه لأبن عمي...

كلها مايهمني ماراح استسلم واحط ايدي على خدي...

وقنع ابوه بالقوة يروح يخطبها مرة ثانية وهشام راح لشيخ حسين الي هو ابو حوراء..وكله السالفة انو ابنه شاريها لبتهم....

وطلبها ونفس حجي مالته كال بتي لأبن عمها...هشام كال لأبنه بعد هاي هي مرتين صغرتني ورحت طلبتها الك ومارضو...

كرار خطية انكسر وانقهر وعافها وكلها انتي بطريق وانه بطريق بعد مالنه نصيب..والسبب ابوج ماعرف شسبب رفضنه...

هشام كلش مقهور على ابنه بس مابيده شي عليه...

كرار صار مايكعد يمهم يروح كليه ويرجع لو ينام لو يدرس وحتى رقية عايفها وهي مقهورة عليه حتى عمه عزام...

اما امه المسكينة ظامه القهر على ابنها بكلبها مو ناقصة كافي المرض البيها...

بيبيته تكله الا اخطبلك احلى بنية وتسوة الف بنية وهو يبتسم الها بس ويعوفهم ويكعد بغرفته بحده...

رقية متمللة ولازمة تلفونها واجتها رسالة من صديقتها...

اساور:هلاو رقووو شونج

رقية:هلاوو سوسي تمام... ولج مو اكلج ماحب تكليلي رقو ويع

اساور:هههه صار فهمنه..ولج رقية تعاي صدك كلما اريد اكلج انسه لاحظت ولد من قسمج دوم عينه عليج وين متكعدين اشوفه وره كروبكم يكعد

رقية:عااااا منو هو ولج يراقبني يمه خوفتيني

اساور:ترا كلت بشر مو جني عابت شبيج خفتي..هو اني وين اعرفه بس اشوفه اكلج عنه

رقية:يمه لا لا لتكليلي ماريد اعرفه ولا اريد اشوفه وافهمه غلط

اساور:خايفة تحبينه ههههههه

رقية:اي ماريد احب هيج احسن الي

اساور:هو بكيفج تحبين لو لا ههههههه الا اراويج هذا الولد لعد

رقية:هسة انتي جاية مدفوعة عليه شتردين عابت

اساور:ماكو هيج مشتاقتلج..واسأل على حبيبي كرار هههههه شونه خطبتوله لو لا

رقية:اي ولج خل اسولفلج.....

بالجهة الثانية...

عزام يريد يروح الحشد وراح يودع هشام بعد ماودع امه وابوه...

راحله بالديوان دخل عليه...

هشام شافه دخل بطوله وبدلته العسكرية...

هشام:هااا يخوي ماشي

عزام:اي يخوية ماشي

هشام ابتسم بس بكلبه خوف:في امان الله يخوي..ربي يرجعك ان شاء الله

عزام ابتسم اله:هشام

هشام بلهفة:عيوني يخوي

عزام:جهالي امانة يمك لتخليهم يحسون بغيابي ابداً وصيرلهم اب من بعدي

هشام:عزام كافي لا تزعلني يخوي..الله يردك وتكون الهم اب وسند طول العمر..وهمه اولادي من غير ماتوصي بوجودك وبعدمه همه جهالي

عزام باس راسه وخشمه:والنعم منك اب واخ يبو كرار..يالله تآمر على شي

هشام:اريدك سالم..دير بالك على نفسك..وضحك..اشوف هل مرة ماكو مشاكل ان شاء الله دوم

عزام ضحك:قنعتها بس اسبوعين وارجع

هشام ضحك:يمعود النسوان يرادلهم عقلين وكلبين حتى تقنعهم

عزام:هههههه انه الي عندي بلا عقل بس عصبية ولسان..انته مرتك الماسة ماكو منها وفاهمة كول الحمدلله

هشام:هههه الحمدلله الله يعينك يخوي

عزام:يالله سلامي لكرار ماشفته حتى اودعه..دير بالك عليه فدوة لكلبك يخوي لتكسر بخاطره بشي

هشام:اووف ياخوي شبيدي عليه متكلي..في امان الله....

عزام مشه خطوات والتفت لأخوه الي يراقب خطواته وطوله...باوعله بنظرة بيها ألف حجاية...

ورجع التفت وراح...

هشام حزن من صدك هل مرة لروحته..والتفت ليساره واتذكر ابنه كرار الي متغير هل ايام وميشوفه الا قليل...

وغير زوجته ومرضها كاسر كلبه..باوع للجانب المشرق والايجابي وبكلبه كل الأمل برحمة الله..والي ييأس من رحمة الله هو الي ماياخذ شي من الحياة ويترسه الخذلان والخسارة...

باوع بعين ربه واتمنى الله يحفظ عائلته...ماعنده غير اخ واحد وابن واحد وهذول كل حياته من بعد امه وابوه...بس عنده هواي خوات الحمدلله...

مرت الايام يعني 10 ايام هيج... وبين الحلوة والمرة...

وحوراء متعايشة ويه وحدتها ومجتهدة بالدراسة...

وكرار طبعاً ماكدر يبتعد عن نسمة ورجعلها ورجعو يتحاجون ويكلها ماكدر اعوفج وهي هم...بس بدون مايدري ابوه...

وفرات صحتها نفسها اصلاً مضاعفات المرض زادت..وكلهم الدكتور المرض نفسه مو هو راح يسبب وفاتها بس مضاعفاته اذا زادت خطر عليها...

تاخذ العلاج ويم الله مخليها...

رغم هذا كله ايمان تحسدها على كلشي...برغم المرة مريضة وراح تموت بس كلب ايمان حسود تريد كل خير لنفسها..وتحسدها على هشام برغم عزام ماقصر بحقها ابداً وصايرلها اب وام و وطن...

هواي هيج اكو مايملي عينهن بس التراب...

خل نمشي لبيت الشيخ حسين...

حوراء توها راجعة من المدرسة وجان تشوف بوجها عباس ابن عمها بالباب كاعد...

شافته وحست بالقرف من شكله..شكد تكرهه وتمقته واحد سرسري دوم يتحارش بيها وهي بت عمه النذل...برغم مرتب وسيم بس كلبه وصخ واخلاقه وغيرته صفر عليها...

طبعاً هو يريدها وبس هي يتعرضلها هيج..المصيبة اخوه هم نفسه يريدها...

عباس بيده جكارته:هلا والله ببت عمي الحلوة

ماردت عليه ورادت تدخل..اعترض طريقها بيده...

عباس:ليش مستعجلة حوريتي حبيبتي

حوراء بكره:تاكل طن خرا.. حبيبتك..كال حبيبتي..عيييع قرفتني من شكلك..وخر مابقه الا انته شنو خلصو الزلم

عباس لزمها من ردانها:على شنو شايفة نفسج..هو انتي مصيرج الي وغصبن على خشمج وتاكلين طنين تبن لو تجرأين تفتحين حلكج..وغصبن على الخلفج زلمة وتاج راسج

حوراء بعصبية:تاج راسك الخلفني...ولو تبقه اخر رجال على وجه الارض ماتاخذني تحلم حلم والله..وخر لا اكل لأبوي تعترض طريقي..عبالك الرجولة بس عكال وجفية وشوارب..ترا حتى الكلب عنده شوارب

عباس لزمها حيل وسحبها عليه:ترا حظج اطيحه واراويج الرجولة شنو مو عاجبج بت الكلاب تاج راسج انه

حوراء صاحت:بااااباااا الحكني...

بالصدفة حمزة جاي لبيت ابوه وشاف عباس لازم ياخة حوراء..راحله ولزمه...

حمزة:ولك كو..... شعندك لازم اختي هااا..ان شفتك تعترض طريقها الا اطيح حظك..والتفت لحوراء..شسوالج

عباس:على كيفك ماسويتلها شي هي غلطت عليه وردت ادبها

حوراء:جذاب راد يضربني ولازملي الباب اول ماجيت من المدرسة ومنا عالم وناس شنو احنه بالشارع

حمزة:ترا لخاطر عمي محترمك ومخليك تلفي هنا والا انته جيتك ماتستاهلها ومرة ثانية تعرضلها الا اكسر راسك وايديك ورجليك والله

عباس وخر ايديه عنه:وخر لا اطلع مراجلك عليه روح شوف اختك متأخرة وين جانت

حوراء:جذاب والله ما متاخرة دوم هيج اجي امشي على كيف وتوه اجيت والله

حمزة:اكل خرا ولي يالله اختي تشرفك عااار..وانتي دخلي جوى شعندج واكفة...

حوراء دخلت بسرعة وظلو يتعاركون حمزة وعباس لمن اجه الشيخ حسين وصيح عليهم وكلهم شنو مزعطة انتم كل يوم عرايك....

بيت  هشام....

كاعد بالديوان وجاي يفكر بأخوه اجه على باله..مشتاقله اكثر من اي وقت راح..ومايعرف ليش هالشوق فز بكلبه صارله ايام....

حازم اجه وكرار وياه:سلام عليكم

هشام:وعليكم السلام والرحمة..هلا اخوي حازم

حازم ماعرف شيكله وكلبه يدك حيل وخايف على ردة فعل هشام...

حازم:ابو كرار اكو شي لازم تعرفه

هشام فزع كلبه وكام وكف:خير حازم شكو

كرار:بويه هدي اعصابك ان شاء الله خير

هشام حس كلبه:حازم شكو..عزام بي شي احجي

حازم بحزن:ماعرف شكلك يابو كرار..والله عرفنه صارله يومين مفقود ماكو اله اثر

هشام ترك السبحة البيده وطاحت بالارض:حازم شهل الخبر وشلون عرفت منو كلك..اخوي صارله شي وماتكلي احجي

حازم:مانعرف بس صارله يومين مفقود..ابن جيرانه الي وياه رجع اليوم وكللنه

هشام انفجع وظل ساكت ومايعرف شينطق..كلبه وجعه وخوف سكن كلبه...

هشام نطق بعد الصمت:مفقود..يومين..يعني اخوي صارله شي..عزززاااام..ياويل حالي اذا صارلك شي...

وراح طلع وعافهم ولحكوه كرار وحازم...راح يتأكد من الخبر...

وبعد يومين وهمه مرعوبين ولا احد غمضت عينه...وامه كالبتها عزاء حتى قبل لا تسمع بخبر استشهاده...

وخواته هم خطية مسوينها مناحة...

هشام صار متأكد مية بالمية اخوه راح بعد ميرجع ونصب عزاءه بكلبه قبل عيونه...ويتمنى ويندعي يرجع ومابي شي...

الكل منتظر خبر يبرد كلبهم.. اجاهم الخبر الي نزل صاعقة على الكل...

هشام من سمع كلمة اخوك استشهد لزم كلبه بألم وصاح...لا مو صدك عزززاااام خويه...يتبع

ارجع مالي حيل اشتاك💔....ارجع يامكلت ارجع...



وصلو البارت الف نجمة والتعليقات

تحياتي

الكاتبة التميمية...... altmeme313