هدية الشيخ هشام

القصة حقيقية ممزوجة بالخيال

البارت الاول

عكال وهيبة وشوارب وغيره..هو هذا الشيخ ابن الشيخ فخر للديرة..

من يدخل الديوان الكل تدك تحية وبأمره تظل بحيره....

ياترى ممكن بهالعمر يرجع يتسلل العشك لكلبي من جديد ويشيل بداخله شوك لمحبوبه وينبض بأسم معشوكه....

الحب مايعرف عمر معين ابداً يجي من غير انذار ويدخل للكلب ونلكه نفسنه فجأة ينبض بغرام المقابل....

البارت الاول....

كاعد بديوانه وصافن وبيده سبحته..ونظره موجه على محبسه وحركة السبحة بيده..

اجه ابنه:سلام ياشيخ

هشام عدل كعدته:هلا بعد شيباتي

كرار:هلا بيك بويه كاعد وصافن يابه لاتكون عاشك هههههه

هشام:هي وحدة خذت كليب أبييك وماراح ترجعه ابد

كرار:ومني هي يابه لا يكون تحب على ام كرار

هشام حط ايده بثقة على لحيته:لا بويه ام كرار عزيزة وغالية..بس الي يعشكها ابوك تفكته من تتوجه لجل الحق

كرار:والنعم منك ياشيخ ومن تفتكتك اكيد مطرزة بغيرتك الذهب.. يابه اجيتك بموضوع بس ماعرف شون اكوله

هشام:عيون الشيخ انته تآمر أمر حاضر أبييك

كرار:سالم راسك ياشيخ..يابه الصراحة مستحي ماعرف شلون ابدي وياك

هشام:خير بعد شيباتي ليس مستحي من ابوك وكايلك ابد لتستحي يمي واطلب شتريد..محتاج فلوس

كرار:الصراحة بويه مامحتاج فلوس وانته مامقصر وعلى راسي تسلملي كون..بس السالفة ومابيها.. هي بنية صايرة بخاطري

هشام ابتسم:اهااا كرار يبعد ابوك عاشك..ههههه والله وكبرت يبن ابوك

كرار ابتسم:اي كبرت والصراحة اريد اطلبها فدوة رحت لشواربك بويه

هشام ابتسم:ابشر..بس دراستك بويه بعدك ماتخرجت وانته صغير على مسؤلية زواج هو مو مجرد كلمة وفراش وعشك بس..الزواج مسؤلية بويه

كرار:بويه تعرفني ما يأثر على دراستي شي واجيب النتيجة العالية دوم..وماراح اقصر بدراستي ابداً حتى لو تزوجت..وانته بعمري تزوجت وجبتني بعد شنو..والله بخاطري هل البنية واعرف مسؤلية الزواج ومستعد الها هذا الشبل من ذاك الأسد

هشام ابتسم:ابشر يبوك..منو هالبنية وبت منو واعتبرها صارت الك ولو مهرها يصير صبها ذهب تصير الك اعرفك اكبر من عمرك وزلمة انته تربية ابو هشام 

كرار بأبتسامة:تسلملي والله ياشيخي فدوة رحت لعكالك وشواربك..هي وياي بالكلية وهي بنت.......

(لحظة لحظة وقفة شوي خل اعرفكم بطلنه اكيد فضول قتلكم😉)

(الشيخ هشام )ومعنى اسمه الجود والكرم والسّخاء والنبل...ابوه سماه هيج ورباه على هالصفات...

شيخ وابن شيخ..كله هيبة وغيره..وطيبة كلبه وصلابة شخصيته يعرفها الكل..

مواصفاته..عيونه بنية وشعره اشكر على بني وحتى لحيته بيها شكار وشيبات بيها اختلط ويه الشعر الأشكر وناطيته هيبة وسامة...بس ولا كأنه ابن ال39سنة وراح يدخل ال40 ولا يبين عليه وكأنه بالثلاثين...

نظراته حادة وكلها ثقة..كلمته وحدة ولا تصير ثنين من يحلف بالشوارب منو يكسره الحلفان...

مالكيت صورة تشبهه تماماً بس هاي يشبه الشخصية بس هشام اشكراني...



هشام مزوج من عمره 19 وتحمل مسؤلية  وصار عنده بعد شهرين من زواجه كرار وبعد الله ماكتبله ولا طفل...

خمسة اطفال ينولدون ويتوفون بعد الولادة مباشرة..وزوجته كلش تعبت بعد ماتكدر تجيب طفل...

واكتفه هشام بكرار بالرغم امه وخواته يكلوله ازوج بس هو مايريد يتزوج ويكول عندي كرار كافي الحمدلله ربي ماكتبهم الي...

وكرار مايقل عن ابوه هيبة وكرامة وسامة وطول وعرض...من يمشون سويه ولا كأنه اب وابنه عبالك اخوان من ضخامة ابنه كرار...

هشام استلم المشيخة من ابوه قبل جم سنة لأن ابوه فقد بصرة ومايشوف بس ابد ماكطع الديوان وهو يحضر اغلبية الفصول...

وعنده ولد ثنين بس هشام وعزام..وهمه اكثر من اخوان هذول الثنين روح بروح..عزام عمره 30 سنة ويشبه هشام بس عزام عيونه سود...

متزوج وعنده ٣ جهال بنية ولد ثنين...

اما زوجة هشام اسمها فرات وعليها جمال بس للأسف الامراض خذت حيلها وتعبتها والأمراض تمكنت منها..بقت بس عيون من التعب...وكبرت اكبر من عمرها....

عمرها 15 سنة من ازوجت هشام...وصار فترة اكتشفو عدها فشل كلوي وباقية تعاني المسكينة وكبرت اكبر من عمرها...

ابنها كرار راد يتبرعلها ماقبلت ورفضت رفضا تاماً.....يكلها يمه راح افقدج...

تكله ولا تفقد حياتك انته مستحيل اقبل تنطيني كليتك وتظل بوحدة وحياتك تصعب عليك وانته بعدك بشبابك..توك بديت حياتك...

خل اوصفلكم كرار... طبعاً جده ابو ابوه سماه على اسم جده...

كرار..عيونه وساع وكبار وشهل على صفر..وهمين اشكراني ولحيته مو ثغيثة كلش بس تجنن عليه وضخامته وطوله عبالك اكبر من عمره...

عمره 19 ويدرس طب اسنان مرحلة اولى..طبعاً هالمجهود امه تعبت عليه وذبت كل حيلها حتى يوصل هالمواصيل وسعى وتعب والحمدلله وصل لليريده...

وهاي بالصورة يشبهه بس كرار شعره اشكراني على بني



خل نكمل هسة...

طبعاً هشام كل لأبنه صار بويه ونخطبلك البنية الي تريدها وتدلل وطلع يعرف اهلها اصلاً ويعرف شيخهم...

بالصفحة الثانية...

ايمان زوجة عزام تصيح:عزام كتلك ماخليك تطلع تروح

عزام بصياح:وخري عن طريقي احسن ما ادفنج بأرضج ونطيني المفتاح لتخليني اتصرف بشكل ثاني

ايمان:ماتروح وروح ابوي ماخليك..شني هي احنه محتاجينك وانته كاضيها كله بالحشد

عزام:ايمان جاي احامي عن وطني تفهمين شنو وطني

ايمان بجت:وانه وجهالك..ادري تحامي عن وطنك بس لو فقدت حياتك منو الي فهمني وانه ماعندي احد

عزام:اذا متت فهاي قدري وهاي شهادة وفخر اضحي بنفسي لوطني..والكم الله هو كافل كل خلقه

ايمان:وتتركني وجهالك شنو انته ليش ماتحس بينه وتتصرف بأنانية

عزام:ايمان هاي آخر تحذير الج نطيني المفتاح لا قسم بالله امشيج بيت عمج هسة

ايمان:ولا انطيك المفتاح تريد تموتني هم موتني..راح اكول لهشام يشوفلك حل

عزام لزمها بقوة:يابت الناس كتلج طلعي المفاتيح احسن ما امد ايدي وماريد امدها ابداً عليج

ايمان بصياح:ماطلع المفتاح وماتروح واكتلني اي اكتلني وماخليك تروح اليوم يا انته يا انه

عزام ضربها كف قوي:طلعي المفتاح لا احرك عشيرتج كلها

ايمان تعاند:اضرب..اضرب هو انته تصير زلمه عليه بيدك

عزام استفزته كلش ونطاها كف ثاني:شوكت ضاربج حقيرة بت الكلاب هااا..وضربها مرة ثانية..زلمة وغصبن على ابوج والجابوج كلهم

ايمان ماتسكت لسانها شطوله وتغلط عليه وهو استفزه هالشي كلش وصل حده شالعة كلب كلبه وكل هاي مايمد ايده بس هسة كلش ضاكت بي منها...

وطاحلها ضرب ودفر...وهي تصرخ وتغلط وتطاول عليه...

اجت ام هشام على صياحهم..وظلت ادك عالباب..

جهالهم بالصالة خافو وهمه يسمعون امهم تصرخ وابوهم يضربها...

اجه هشام:خير يمه شصاير هنا

امه:هشام الحك يمه اخوك موت مرته كتل

هشام:عزام يكتل مرته ليش شصاير الهم

امه:شعرفني هاي صياحهم من مساع

هشام:علمود روحته للحشد كالعادة صياحهم واصل للشارع..وراح دك الباب..عزام خويه افتح خلي احاجيك مو بالكتل بويه

عزام عافها بغضب:وين المفتاح بت الكلاب

ايمان وهي تبجي:كسر ايدك كون

عزام بغضب:وين المفتاح اكلج ترا وعلي ومحمد اكتلج بطلقة وحدة

ايمان وهي تبجي:جوى الجورباية..روح بس بعد لا تتوقع ابقالك هنا..وعساك مارديت

عزام:ادعين عليه ياام جهالي..والله ياريت مارجع اشوفج بعد مليت منج وتعبت كافي لهنا..روحي بيت عمج وديري بالج ارجع اشوفج اخلصج من الدنيا....

وراح طلع المفتاح واخذه فتح الباب وهو غضبان وهشام صار بوجهه...

هشام:عزام شبيكم شصاير

ام هشام:يمه ليش تكتل بت العالم هيج ومو تدري هي مالها احد ليش هيج

عزام:ماكو شي متريدني اروح الحشد..يمه انه تعبت من ايمان ورتني الويل لسانها شطوله وترادد وتغلط شنو انه حايط..هاي حدي وياها خل تروح لأهلها

هشام:اهدا ياخوي مو هيج الحلول مو كل مايتحاجون المرة والرجال يمشيها لأهلها..وهي انته سندها الوحيد ماتريد تفقدك..والله انه هم ماعاجبتني روحتك بس شسوي هذا وطنه وماكدر احجي

عزام:يبو كرار انته تعرف شكثر احب وطني واريد اقدم ولو جزء بسيط آمن لابناءنه وشعبنه..يالله انه ماشي تريد شي ياخوي

هشام:الله يهديكم..في امان الله ربي يحفظك من كل شر يخوي وترجع سالم..وربي يقويك على محاربة الفساد

ام هشام بجت:بعد امك ليش تحرك كلبي هيج وكلما تروح تحركه بروحتك

عزام باس راسها:يمه فدوة لشيباتج اندعيلي بالقوة والتوفيق على اعداء الأسلام

ام هشام رفعت زيجها للسما:روح يمه الله يحفظك وينصرك على كل اعداءك...باست جتفه وحضنته قبل مايروح...

هشام حضنه وضرب على صدره:محروس بعين الله ورسوله واهل بيته ياخوي ترجع بالسلامة

عزام باس خشمه:الله يسلمك يخوي..وصية جهالي ديري بالك عليهم..اذا صارلي شي لتخليهم يتشتتون بركبتك اولادك ذولي

هشام:شهل الحجي همه اولادي اسم الله عليك ياخوي ان شاء الله ترجع..ويكبرون بعزك ودلالك

ام هشام:يمه اسم الله..ان شاء الله عين الزهراء تحرسك يمه...

عزام باس باطن كفها وراح باس جهاله ودع اخته الزغيرة وراح باس راس ابوه وراح ودعهم...

هشام لزم كلبه حيل وهو يشوف اخوه يروح كبال عيونه..يمشي بطوله الفارع بالبدلة العسكرية...غمض عيونه وردد..ربي يرجعك سالم يا سند كلبي وابن روحي........

عزام مو بس اخ بالنسبة اله هذا حزام ظهره وصديقه وحبيبه وضوى عيونه ويعتبره بمعزة كرار..كلشي ولا يفقد واحد منهم...يفقد كلبه وياهم...

راحت ام هشام لإيمان مرت عزام وشافتها مكفشه وتبجي وحالتها حالة وجاي تلم ملابسها...

ام هشام:إيمان وين رايحة ماخذه ملابسج يمه

ايمان ببجي:عمة بعد مابقه هنا ولا دقيقة شوفي حل لأبنج خل يعوف الحشد يالله ارجع

ام هشام:وين ترحين..بيت عمج يالله يحملون نفسهم هنوب يتحملون جهالج

ايمان:مو مشكلة نتحمل احسن من ما كل يوم معارك ويه ابنج تعبت من هالعيشة كله عرايك بسبب الحشد وروحته لهناك..انه شريد غير يبقه يمنه ومايعوفنه..اذا صارله شي منو ألي

ام هشام:اسم الله الرحمن..وانتي هم لسانج شطوله عليه هو مو مكرن حتى هيج تغلطين ترا عزام مل وتعب..تره الرجال ميقبل على نفسه وكرامته..وهو لو مايحبج مايتحملج تغلطين وتحجين اشكال عليه وهو ساكت لليوم ماكو زلمة هيج مو لأن ابني بس زودتيها وياه

ايمان:مو هو ينرفزني اموتني قهر..شوفي ابنج هشام شايل مرته بالصلوات وانه عزام كله عرايك وياي

ام هشام:كتلج من لسانج الزفر..فرات شايله رجلها بروحها بالرغم من مرضها وتعبها..واذا كللها كلمة ماترادد ومن تشوفه معصب تهدي مو تغلط وتحجي عليه وتزيد الحطب

ايمان:يعني هسة انه طلعت مو خوش انسانة

ام هشام:اي لسانج هذا عام عليج..رجعي ملابسج ويالله طلعي لجهالج خافو وهمه يسمعون الكتل والربد..والله اكول تستاهلين بس كلبي ماينطيني عليج ماعندج احد..ظبي لسانج يابت الناس ولدي مايحبون الغلط ومايرضون بي

ايمان:والله ياعمه راح اروح بيت عمي ومايلزمني شي وحتى هشام مايمنعني...

وكملت لم ملابسها وعمتها تحجي وماتهتم....

بمكان ثاني...بيت من بيوت الشيوخ...

كامت بتعب من فراشها تروح الحمام..اليوم كلش تعبانة ومريضة..فتحت الباب وصارت بوجهها وحدة من زوجات ابوها...

جوهرة:ياهلا بعد امج نايمة للظهر حضرتج شبيج

حوراء بهدوء:مريضة شوي

جوهرة:ونايمة عبالج النوم يطيبج..امشي وساعدينه وهسة يتركج المرض

حوراء سكتت ماتكدر ترادد وحدة من نسوان ابوها تبتلي بلوة وابوها يطيح حظ حظها صح يحبها وحنون بس مايرضه بالغلط...اصلاً مو من تربيتها ترد وتلاسن...

راحت بتعب وساعدتهم..هي عدها خوات من امها ونسوان ابوها...اصلاً عدها كومة اخوان...

ومن مرت ابوها الجبيرة عدها 3 اخوان كبار مزوجين ومو بالبيت كلمن طالع بيت بحده...

وعدها خوات مزوجات همين والباقيات صغار ومراهقات وهي اكبرهن...

امها الزوجة الثانية...وجوهرة الزوجة الثالثة وهاي لا تصعد ولا تنزل عد الشيخ وهي اليحبها اكثر شي..هو الشيخ عنده 3 نسوان...

خلصو شغلهم وصبو الغده والتمو كل العائلة....

حوراء ماكلت شي قليل ماتشتهي...

حوراء: انه رايحة ادرس شوي وانام..عن اذنكم.. وكامت..

الشيخ حسين:تعاي رجعي كملي الاكل بويه مو كايلج لتكومين من السفرة..وشبي وجهج اصفر

حوراء:بابا والله ماشتهي..مابيه شي مريضة شوي فلاونزة

الشيخ ابنه الجبير اسمه حمزة....

ابو حمزة:يالله لعد ارتاحي ولاحكه الدراسة هسة

حوراء:صار...

وراحت لغرفتها هي وخواتها هاي الغرفة...نزلت دموعها من تذكر حدها بس السادس وتطلع من المدرسة هاي قانون ابوها ماكو كلية...

تموت حسرة على دراستها وماتكدر تعترض بس الولد الهم حق بالكلية..وتشوف نفسها مصيرها نفس خواتها ماكملن للسادس حدهن ويطلعهن ابوها...

ويزوجن بعدها ومصيرهن بيت زوجهن..والي ما مرتاحة والي شابعه كتل والي رجلها يحب غيرها..بس وحدة مرتاحة وخذت ابن عمها وهو يحبها وتحبه...

هي عدها عمام هواي..وكلهن مزوجات ولد عمهن وابوها كل يوم تجي بنية تشكيله ومايقبل على بناته بس مايكدر يخرب بيوتهن...

ظلت تنزل دموعها اكثر واكثر على ظيمها وحزنها من ألم الي صارلها قبل...

اكيد تردون تعرفون حوراء منو 😉...

خل اوصفلكم حوراء...عيونها بنية كبار..شعرها اسود وبي ردة شوي بس حلوو عليها يخبل ويرهم عليها طويل وثخين..حنطاويه على خمرية بشرتها...

بيها شي مميز وحلوة من تبتسم بس الأبتسامة قليلة عدها..هادئة وطيبة حيل..عاقلة ومن البنات الفاهيات الي يمشون بطريق مستقيم ماتروح منا لو منا...

مو كلش طويلة ولا كصيرة رشيقة وخصرها رفيع كلش..كل خواتها يحسدنها عالخصر هذا...عمرها 16سنة بالثالث متوسط...

امها ماتقبل تحف ولا تكص شعرها هو صح بي رده بس من يسحبنه الها خواتها يخبل يصير..اصلاً لايك عليها هالشعر كلش...

هاي الصورة تشبها...حتى الشعر يشبه شعرها👇



هي تنسه همومها بس من يجمعن خواتها شكد حلوو يصير وناسة وكعدة وسوالف بنات..ويكلولها المعقدة لأن ماتحب شي ولا تحب تسوي شي لشكلها...

وكله معبسة وقليلة الضحك وهنه من يجن سبب ابتسامتها بس من يضحكون ماتحس الضحكه تسلل لكلبها..وكأنه حياتها فارغة مابيها شي مهم...

صح تدرس وكل اهلها موجودين وابوها مامقصر بشي وعنده خير من الله ويحبها شكثر هي واخوانها بس ساعات تحسه قاسي بقراراته...

ومن يعصب يصير انسان ثاني وعنده الجوهرة خط احمر هاي ماكلة عقله اكل صح مو خبيثة وياهم..بس اهم شي مصلحتها...

وتشوف ابوها عايف امها ومرت ابوها ذيج وكاضي نهاره كله يم ذيج الجوهرة..ويعدل بالليالي وبكلشي بس بالنهار كله ويه جوهرة لو فارغ...

وهاي كاضيه ايامها عادي...امها عصبية وشديدة وياها على كلشي...وتمشي وتصيح عليها على هاي وذاك وعلى لبسها وعلى كلشي...وماتدري بيها كلت شربت نامت...

وحتى خواتها هيج وياهن امها...حوراء عدها اخوها الزغير تتسله بي..عمره سنتين هاي هي كلشي تسويله تلبسه وتغسله وتنيمه من ترجع من المدرسة...امها كل حنية ماعدها...

كله لاهية بالعرايك ويه جوهرة..شكثر يتعاركن ويتصالحن ويتعاركن وهيج كاضياتها...

هي فاتتها سنة مدرسة بسبب حادثة هي سبب تعاستها واختفاء ابتسامتها....وتعرفوها بالجاي شنو هي...

خل نرجع لبيت شيخنه...

ايمان مشت مارضت تبقه بالرغم حجو وياها وهشام ماحجه كال خل تروح هي جم يوم ماتتحمل اصلاً بيت عمها..

يدرون بيها شكد تزعل بس ماتطول ترجع بسبب مرت عمها الخبيثة ماتنحمل وهي ايمان ماعدها احد غير عمها...

اهلها متوفين كلهم واخوان ماعدها غير واحد وعايش بالخارج شارد عليه قضية وهارب...

هي ايمان برغم ماعدها احد الا انها خبيثة وانانية وميهمها غير نفسها..ماتندله القبلة ابداً وماعدها غير اهتمامها بشكلها...

مرت جم يوم بيت عمها وخابرت عمتها وكالت الها تعاي اخذيني...وراحت خذتها...

هشام كاعد بديوانه ويمه زلم...اجاه اتصال من شخص...

وبدخلة واحد من ولد عمه:ياشيخ الحك..مصيبة مصيبة.....يتبع