البارت التاسع
طلع من الغرفة وصارت ايمان بوجهه...
ايمان:هاا ياشيخ رايح تحل المشكلة الجابها هالولد الطايش
هشام بدون ميباوع الها ويلبس بساعته:اي...
وراح عنها..وهي تباوع لطوله وهو يريد يطلع تموت حسرة على هالرجال الما منطيها وجه ابداً...
توعدت الا تخلي ينشغل باله بيها وقررت تلجأ لجمالها وشكلها الجذاب...
الرجال يحترك من داخله على ابنه والمصيبة الي جابها اله وهاي حايرة بكلبها😒
ام هشام راحتله بتوتر:هاا يمه رايح للزلم تحجي وياهم..يارب خير ويحن كلبهم ومتصير سالفة جبيرة..كون يتنازلون عن القضية
هشام:لتخافين يمه ماياخذون غير فصل فلوس..ومستعد انطيهم اليردونه بس ميأذون كرار
ام هشام:الله يحفظه الك يمه والله طك كلبي عليه هالولد مايسوي هيج شجاه كتله بس اختار بنية مزيونه من هالبنات واخطبها الك بس شنسوي لكلبه عشك
هشام:يمه صرت ماعرف تربيتي والله شكول..يالله حجية الله وياج
ام هشام:بحفظ الله الرحمن الرحيم..دير بالك يمه ليسون بيك شي....
طلع راح بره...
هشام صعد سيارته وتنهد بحسرة:ليش بويه هيج سويت بأبوك ليش....
طبعاً همه كالو ميعقدون كعدة الا يرجع كرار ويكون موجود وراح تبقه العداوة والحزازية بين العشيرتين الى ان يرجع ويشوفون وين تصفه وحالياً رافعين قضية اختطاف بحق كرار...
هشام بقه محتار بأمره وشلون يلكه ابنه ويرجعه...مرت
هل ايام صعبة عليه حيل وهو يدور ويفكر ويحاول يلكه ابنه واتصل بأصدقائه الي يروح وياهم وماخله شخص يعرفه يعتب عليه وما سأله...
ولا خله مكان يروحله كرار مادوره..حتى خابر خواله يسألهم...بس امجد ماخابره...
يجتمع بشيخ حسين واخوانه ويتناقشون ويصير صياح وعرايك من ناحية اخوانها وابوها ويطلعهم ابو حمزة من المجلس يالله يهدون...ولا يحترمون وهشام لحد هسة يتعامل بهدوء واخلاق وياهم...
كاعد صافن ويفكر بكرار شنو احواله وينه هسة ياترى...فز من صفنته على صوت تلفونه باوعله لكاه امجد نسيبه خال كرار...
هشام رد:هلا خويه ابو اكرم شلونك
امجد:هلا بيك ابو كرار شخبارك
هشام بهم:على الله ياخوي..ماتعرف اخباري لو اكلك ماتصدك
امجد تحمحم:خير خو ماصاير شي احجيلي ياخوي
هشام:كرار سوالي مصيبة ماتسولف وصارله ايام مختفي وادوره وماكو..ماكتلك ماردت ازعجك بمشاكلنه اعذرني
امجد يكول داخله سامحني خويه هشام عالكذب:معذور بو كرار..الله يلعن الشيطان وهسة شلون وشمسوي انته ياخوي وهو وينه هسة
هشام استغرب ردة فعله وكأنه يعرف حتى ما سأل شنو السالفة...
هشام:شمسوي انه ظال على رحمة الله اريد الكاه بس.. ماخذ بت الناس اجو هدو على بيتنه بالسلاح وجاي احاول تنحل بسلام بدون زهق ارواح
امجد سوى نفسه متفاجأ:لاااا لتكول كرار العاقل يسوي هيج لا ما صدك هاي سوايته
هشام:منيله العقل هذا اي عقل ماعنده الغبي الطايش ورطني بمصيبة جبيرة وشيحلها خاف يقتلونه..اريد اعرف وينه بس..امجد اذا كرار يمك كلي لا تظم عليه ترا السالفة مو هينة عرض الناس مو لعب..كلي كرار اجاك مو هو ماعنده احد غيرك يلجأ اله يساعده
امجد مايكدر يجذب على هشام اصلا عيب بحقه:الصدك ياخوي كرار يمي واجه عندي دخيل وطلب مساعدتي ماكدرت ماساعده وهو عزيز عندي ومن ريحة المرحومة فرات
هشام كام:ياللهي..امجد تعرف شسويت انته شاركته بالجريمة ورافعين على الغبي قضية خطف بتهم..وينه هو خلي يحاجيني وانه من هالدقيقة جايكم للنجف وعندي حساب وياه..وين بت العالم مسويلها شي امجد كلي لامسها لو شنو احجي
امجد:لا لا يحلف وعلي ما لامسها ولا طاخها ابدا البنية طاهرة ونظيفة وماسوالها اي شي قبل لا يعقد عليها وهسة عقد عليها هو.. حذرته مايقربها هسة بعد ماعرف الي بينهم همه بغرفة وحدة وماعرف شصار بينهم
هشام راح توجه لسيارته:انه جايكم بعد جم ساعة تلكوني يمكم..لا تكله جاي ابوك امجد خليها بيناتنه ازعل عليك اذا تكله
امجد:بس اوعدني ما تسويله شي اعرفك حنون ومتفهم وهذا وحيدك هشام ماعندك غيره
هشام:خله تفاهم بعقلي هو دمرني طيح حظ سمعتي صارت بين الرجلين..يالله في امان الله...
وسداه وراح صعد السيارة وشغلها ونزل فتح باب الكراج وطلع بسيارته وتوجه للنجف...
اتصل على رقية تكل لأمه طالع زيارة للنجف وهي استغربت هشام بهالوضعية رايح يزور هسة بيا حال هو مال يسوق طريق شطوله...
كالت لأمها وظلت تفكر وضاجت وكلتلها دكي احاجي هشام..خابرتله وحجت وياه كلها لا تخافين رايح ازور وهم ازور عزام مشتاقله...
بالنجف...بيت امجد...
نسمة صايرة حيل ضعيفة وكله كاعدة بحدها ومرات تكعد تبجي على اهلها بس من تشوف كرار تنسه همها..تحبه وتعشكه وضحت بأهلها وسمعتها لخاطره...
اجت زوجة خال كرار الها....اسمها اسراء...
اسراء:نسمة عيني خالج يريد احاجيك بسالفة
نسمة عايشة بخوف:ليش خالة شكو شصاير اهلي عرفو مكانه
اسراء:لا ولج يمه ليش خايفة هالكثر بعد الي صار صار وانتي هسة مرته لكرار منو يكدر يمس شعره منج وانتي صرتي حرمته
نسمة بجت:والله مجاي انام حتى من الخوف..خالة خايفة يلكونه وياذون كرار يموتنه انه غبية يوم فكرت هيج وهسة خايفة اعم على حياة كرار والله اموت وياه اذا احد اذاه
اسراء:اسم الله لا خالة لتفكرين هيج مو زين عليج اول ماجيتي شحلاتج تخبلين هسة ذبلانة وصايرة ضعيفة كلش..ان شاء الله ماعليه شي شنو هي تايهة الدنيا يقتلون كرار
نسمه:الله يسمع منج خالة والله حبيتج انتي طيبة وحبابه تذكريني بأمي..ياترى هسة شصاير بيها بسببي..ودموعها نزلت...
اسراء:بعد كلبي اني هم حبيتج والله يحفظ امج..نسمة حبيبتي اجيت اسألج سؤال بس لتنحرجين مني وكليلي الصدك..انتي وكرار صارت بينكم علاقة
نسمة مافهمت:شنو قصدج جنت احاجي قبل لا نجي هنا..اي جنت بعلاقة بي
اسراء:هههه لا حبيبتي اقصد زواج المتزوجين..عود انتي دكتورة وذكية مافهمتي
نسمه هسة فهمت:هااا..لا لا ماكو شي صار بينه اصلا ماسمحله حتى يحضني..حتى البارحة عصب عليه كلي ماسويلج شي..اعرف غلطانة خالة بس والله خايفة وماعرف شنو مصيري
اسراء:لا هو التمام مو لازم يصير شي..مو خالج خايف عليكم ثنينكم بسبب هالسالفة..على العموم اسفة احرجتج بسؤالي بس لازم اتأكد
نسمة:لا عادي خالة مصار شي..بس خوفتيني يعني ليش خايف علينه
اسراء:ماكو حبي لتخافين بس يخاف يعتقدون بينكم علاقة جسدية قبل الزواج يفضل تبقون هيج لمن نشوف شيصير
نسمة:اهااا...وسكتت وهي تفكر بأمها وابوها وخواتها وتكول بس لا عرفو اختي ساعدتني خايفة يأذوها ويخلونها تكول وين راحو همه...
بس تكول اختي مستحيل تبيعني وتعترف حتى لو لزمو شي بتلفونها اكيد راح تتصرف هي ذكية...
شوي واجه كرار ودخل كعد يمها وهو ساكت ويباوعلها وهي مدنكه راسها وتشلع بأظافرها كلما يجي تتوتر وتذكر هي شردت من اهلها ومغص يموتها ابطنها...
كرار رفع وجها بيده:شبي حبيبي
نسمة بتوتر:مابيه شي
كرار:لا بيج شي وخايفة شبيج ليش مو مأمنه محد يكدر يأذيج وانه موجود احركهم حرك ومحد يمسج بشعره..وهسة شبيج
نسمه بصوت راجف:يعني شبيه بربك تسألني..كرار خايفة عليك خايفة يلكوك ويأذونك وال...
كاطعها كرار حط ايده على حلكها:بربج مرة بس خلي اجي يمج واحس بسعادة..انه مو ندمان اخذتج هيج ومحد هامني ومحد يكدر يسوي شي وميلكونه هاي الا اذا خالي كلهم عن مكانه..وحتى لو لكونه احنه مزوجين منو يحجي ويمسج بكلمة بعد
نسمة دموعها نزلت:شسوي اخاف عليك..احبك وتركت كل اهلي علمودك ماريد يصيرلك مكروه والله والله ماعيش بعدك..اموت قبلك اصلاً
كرار حضنها:اسم الله عليج..لج وانه تركت ابوي وجدي وجدتي الماعندي اعز منهم علمودج انتي..وحتى دراستي ضحيت بيها والله العالم شوكت اكدر اكملها...
هي دفنت وجهها بصدره...شوي وخرت عنه وتريد تكوم...
نسمة:انه اروح اساعد خالة ام اكرم زحمة كله كاعدة هنا
كرار لزمها:ولج تعاي من اجيت انه تردين تشردين
نسمة بتوتر:ماحب نكون وحدنه كرار اخاف
كرار:افى تخافين مني..ولج انام يمج طول الليل هسة خايفة مني..تعاي ماسويلج شي نطيتج وعد وحلفت مالمسج هسة
نسمة:فديتك حبيبي..كعدت يمه ولزمت وجهه وتباوع بعيونه..كراري احبك مووت اعشقك حبيبي انته روحي
كرار لزم ايديها ونزلهن:اووييلي رحمة لكلبي العاشك ترا اني الشيطان مصاحبني هل ايام ولج اكعدي راحة جاي يكلي كرار حلالك اول مرة يوز انسان على الحلال ههههههه
نسمة صدكت وكامت:صدك عود كرار وخر عني ماتنطه وجه انته
كرار:هههههههههه ولج اشاقه تعاي..وسحبها يمه وحط وجهه بركبتها يبوسها بخفه بس وخرت ماسمحتله...
نسمة:هااا شكلنه..خل اطلع احسن انته ماتكعد راحة ابد..وكامت وتريد تطلع...
كرار:اصيدج وراس جدي الشيخ اصيدج بيوم ههههههه شردي هسة بعد روحي..الا اراويج الشيوخ شجابت
نسمه سوتله شنوفه طويله وتباوعله بنص عين وطلعت..
وبعد ساعات بالطريق وصل هشام للنجف واول ماتجه لبيت امجد نسيبه وهو نار بكلبه شاعلة وبس يريد يشوف كرار كدامه...
نزل من السيارة بسرعة وسد الباب مالها وراح دك جرس الباب والتوتر والعصبية سيطرت عليه...طلعله اكرم ابن امجد وفتح الباب...
اكرم:عمو هشام هلا..وجهه اصفر وتوتر..منور النجف عمو
هشام:وين ابوك..وين كرار
اكرم:عمو كرار داخل.....
بعده ماكمل دخل هشام وهو يتحمحم وصاح على امجد...
امجد طلع وراح سلم عليه:هلا ابو كرار الحمدلله وصلت بسلامة
هشام كلبه نار:هلا بيك الله يسلمك..وين كرار وينه
امجد:ادخل ارتاح وهسة يجي هو طالع
هشام لزم وجهه:وينه وين طالع اريده حالاً..كلبه بارد وانه نار شاعل كلبي وراح ينفجر
كرار دخل وشاف ابوه وتفاجأ:ابوي...
هشام التفت:كراااار...وراحله وبدون مقدمات...
كرار اجاه كف على وجهه من ابوه بحركة كلب صفر ذانه...
ظل ساكت كرار ودنك راسه يم ابوه...
امجد راح صار بصف كرار: لا ياخوي هشام لا تضربه زلمة شواربه بطوله تمد ايدك عليه..بالتفاهم حلها
هشام بعصبية على ابنه:خليتني ما اسوة وبهذلت حالي كدام الناس صغرتني وسويتني علج لليسوة والمايسوة..وضربه كف ثاني من حركة كلبه وعصبيته...واجاه الكف الثالث وكرار ساكت ويتلقه الطراكات بسكوت...وهشام معصب كلش...
ونسمه طلعت بباب المطبخ على صوتهم وشافت اخر كف اخذه كرار لزمت حلكها بصدمة...
امجد لزم ايد هشام:هشام كافي واهدأ..مو هيج ماعرفتك ابد بحياتي ماشفتك تضربه من هو صغير هسة تضربه من كبر
هشام بعصبية:عقل ماخله براسي الكلب كص وجهي..لو جنت بنية اشررف لي..انته رجال وجبتلي العار..شلون تنهب بت الناس هيج ماتحجي
كرار بهدوء:آسف بويه
هشام بغضب:وين اودي اسفك هذا..اكوله لابوها واخوانها الي هدو عليه بالسلاح وجانو راح يكتلونه كل احنه بسبب عملتك السودة..فهمني هسة شصلح
شسوي بمصيبتك هاي جم حلك اسده وجم عكال لازم ابررله..وقضية الخطف الي رافعيها بحقك شسوي شلون راح اطلعك منها
امجد لزم هشام:اهدا يابو كرار..تعال اكعد وصلي على النبي
هشام بعصبية:شهدا ماتكلي شهدا وابني وحيدي الي ماقصرت عليه بشي يعوفني ويسود وجهي كدام الناس هيج..مالي وجه احط عيني بعين شيخ حسين والله متفشل..وحتى ابوها لوما اخوه الشيخ جان انه وابوي مدفونين هسة...
نسمة ظلت تبجي ولازمة حلكها بخوف ورعب وجسمها كله يرجف حييل...باوعت لمرت امجد وهي دخلتها داخل وتهديها عن البجي....
امجد بالكوة مهدي هشام ومدخله الديوانية وكرار بقه بره ومايريد يدخل يم ابوه ويواجهه...
اكرم: تعال ادخل بوس راسه واعتذر عمي هشام يحبك ماعنده غيرك كوم كرار اعتذر منه وراح يسامحك
...كرار مايريد يدخل وساكت ميجاوب وكسر نص اغصان الشجرة الواكف يمها...
وجهه احمر من ضرب ابوه وهو يتمنه يتفهمه...
اجه امجد مدخله بالكوة وخلاه يبوس راس ابوه ويعتذرله وهشام بعده غضبان عليه....
كعدو نقاش وصار حجي ونقاش كلش حاد وعصبية وصياح وبالآخر كال هشام..يالله جيب بت العالم وامشي نرجع نحاول نحل السالفة....
امجد ماقبل يرحون ويبقون يمهم ويوم ثاني يطلعون للأمام علي يزورون ويرحون المكبرة يزورون موتاهم مادامهم هنا واصلين....
وبقو وطول الوقت هشام ميحاجي ابنه ومشتعل نار وقهر اكله اكل ومو ليلة صارت مية سنة...
وكرار خجلان من ابوه من فعلته وهيج ترك ابوه وراح بسهولة....
نسمة كضتها بجي وخايفة يسولهم شي ويأذونها ويأذون كرار او يرجعون ياخذونها غصب منه...
يوم ثاني طلعو للأمام زارو وراحو المقبرة..وكرار كابل قبر امه وكعد بنص الترابه وبجه بحركة على امه هو اول ما اجه هم زارها ونفس الحالة بجه شكثر عليها...
امجد خاله بكوة مكومة من القبر...وهشام يراقب من بعيد وكلبه تألم على ابنه وهو يشوفه يبجي على امه بحركة...
وراحو زارو عزام وياويل كلب هشام وهو يشوف قبر اخوه..وكله ياحيف هالطول الحلو ينام بالتراب...كام ودعه بعيون كسيرة وحزينة....
راحو لبيت امجد وكرار كل لنسمه يالله نمشي وهي تبجي وتبجي ومارضت ترجع وبكوة مقنعها تروح...ودعت ام اكرم...
وراحو صعد كرار سيارته وهي وياه ولابسة بوشية انطتها الها ام اكرم..وبس تبجي اجو وهي تبجي وهسة رجعو وهي تبجي....
وهشام بسيارته...وانطلقو يرجعون لديرتهم.....
وصلو بعد طريق طويل ومتعب...نزلو كدام البيت ونسمه بس ترجف خوف ومن البجي خلصن عيونها...
اول مافتحت الباب ونزلت ونزل كرار وهشام ويردون يدخلون البيت...
نسمه من الخوف اختفه الضوى بعينها والحيل راح منها وطاحت عالارض مثل الجثة......يتبع
الكاتبة التميمية
ليست هناك تعليقات:
إرسال تعليق