هدية الشيخ هشام

البارت الثاني

مرت جم يوم ايمان بيت عمها وخابرت عمتها وكالت الها تعاي اخذيني...وراحت خذتها...

هشام كاعد بديوانه ويمه زلم...اجاه اتصال من شخص...

وبدخلة واحد من ولد عمه:ياشيخ الحك..مصيبة مصيبة

هشام:شنو الصار صدك الي سمعته

ابن عمه حازم:اي والله ياشيخ..٣ محلات كلهن احتركن..ورفع ايده..سلام عليكم ياجماعة اعتذر ماسلمت..

هشام:لا حول ولا قوة بالله شصار ومنو سوى هيج

حازم:ياشيخ والله مانعرف منو بس مبين فعل فاعل واحد نذل واكيد حاقد عليك بشي

هشام انقهر:استغفر الله حسبي الله ونعم الوكيل..خلي الولد يشوفون شغلهم وخل يرتبون السالفة ولحد يسوي هوسة مصيره هذا ينكشف وراح يكون حسابه عسير يمي

حازم:تآمر ياشيخ..اكول وين كرار رايده

هشام:تلكاه لازم كتبه ويدرس..خير رايد شي محتاج شي يمك انه آمر

حازم:لا ماكو شي يبو كرار وسالم يارب ويديمك النه فخر..بس ردته يحجي ويه ابني بسالفة المدرسة تركها ومو راضي يرجع ماعرف شسويله..ماريد اجبره على شي ولا اريد اضربه رجال شكبره صار

هشام:اهااا جيبه يمي انه احاجي الك..ابنك خوش ولد ويسمع الكلام وانه احاجي الك

حازم:تسلم يابو كرار ماتقصر انته كلمتك مسموعة..هو والله ماعنده سوالف تعبانة وهو وكرار سويه دوم بس شسويله عافها للمدرسة ويكول اريد اشتغل ماعرف شسويله..صارله اسبوعين مايداوم اريده يبنيله مستقبل

هشام:بس خلي يمي وماعليك بالباقي

حازم:صار..هسة عن اذنك يبو كرار

هشام:الله وياك ياخوي...

راح حازم...

هشام عنده جم محل ولد عمه يشتغلون بيهن وهسة واحد حاركهن متعمد..هاي واحد مواتب هشام وعائلته وكل فترة يسوي سالفة تعبانة ومايعرفون منو...

وهشام مو ساكت عنهم ولا خايف ابد بس يكول هاي فعايل واحد جبان يسوي هيج ومايبين نفسه..يجي يوم ينكشف هو وفعايله....

لحد هسة مخسرينه ملايين بس مخليها يم الله يكول هو مايضيع حق احد...

يوم ثاني بيت الشيخ حسين....

تبجي بحركة ومن كل جوارحها.. والدم بكل مكان فراشها والأرض...

ظلت تنحب وصوتها مخنوك تحترك من الداخل والخارج...ملخت نفسها بجي...شافت ابوها دخل وياه رجال...

باوعت بوجهه وانفجعت...

وفزت من حلمها مفزوعة وخايفة وترجف وبلعومها يابس وتريد تحجي ماتكدر مايطلع صوتها...

كامت تنكت بيديها وتبجي ودموعها تنزل بحركة وقهر...

كامن خواتها على صوت بجيها....

وحدة من خواتها عمرها ١٣ سنة:حوراء حبيبتي شبيج

حوراء ماتكدر تحجي وبس تبجي الكابوس مرعب ورعبها حيل وجسمها كله يختض من الرجفة والبجي ومخنوكه وصوتها مايطلع...

كامت اختها جابتلها ماي وصاحت لأمها وابوها وكلتلهم حوراء كاعدة تبجي وماتحجي شبيها بس ترجف...

كامت امها الها وراحت الها شافتها وتكلها عن دلع البنات ويالله كومي...

بقت حوراء هيج نص ساعة وخواتها خايفات وشوي رجع صوتها وكفت الرجفة بجسمها...

ورجعت الها امها ظلت تصيح عليها:يالله كومي بدلي مو وراج مدرسة

حوراء كامت بدون حجي تريد تطلع تغسل...

امها:ولو اعرف مصيرج بيت رجلج ومصيرج تزوجين ابن عمج عباس

حوراء:لو يبقه اخر رجال على الارض ماخذه هذا الصايع هو واخوه الوصخين القذرين وماعوف مدرستي

امها:اكلي تبن ذول ولد عمج..وبعدين شبي عباس..خاف عبالج ابوج ينطيج لأحد غريب لا عمري ابن عمج عباس هو مصيرج ونصيبج وغصبن على راسج بكيفج هو

حوراء:انتم سوها وانطوني لقنادر هذا وشوفو شلون اصخم وجهكم كدام الناس واحرك روحي وساعتها فرحي بالفلوس يمه

امها ضربتها كف قوي:طاح حظج هيج تحاجيني وتهددين مو انتي الظاهر ماتربيتي عدل لازم اعيد تربيتج..كلبه..وضربتها كف ثاني..امشي ولي..تحرك روحها الحقيرة..تهددني عود

حوراء لزمت وجهها بخذلان وسكتت مارددت غير اسفة يمه ماقصد اقلل احترامج...وراحت للحمام تغسل...

دموعها ظلت تنزل حتى بدون بجي وتمسحهن وينزلن..وظلت بس شفايفها ترجف من الدموع وبدون صوت....

اخر شي ظلت تشهك وتبجي وتبجي اذا امها ماتحن عليها يعني تتوقع من رجل راح يحن عليها ويحتويها بكلبه بعد الزواج...والله ماتتوقع ابداً وتكول حظي الاعوج نفس خواتي اكيد الا اسوء...

وهنوب شنو من رجل هو الي مسمينها بأسمه انكس خلق الله ودوم تسمع سكير وتكول مستحيل ابوي ينطيني اله وماريد اتزوج اصلاً...

ابوها ماينطي واحد سكير تدري بي هاي احلام امها..همه عدهم فلوس لذلك امها تريدها تزوجه....

هو اخو الشيخ حسين حجز حوراء لأبنه وهو ماحجه الشيخ حسين وساكت جان..بس بالأصل مستحيل ينطيها لأبن اخوه وهو يعرفه سكير...

حتى اخوه طايح حظ ماظلت بنية ما طفر عليها وسوى مصيبة لأبوه..وشكد دفع فصول وتعب منه وماكو فايدة بي...

هسة مسجون حاليلاً بسبب فعله شنيعة ابوه خلاه حتى يتأدب بالسجن..يكدر يطلعه بس خلاه...ومنع امه تروحله ويكلها يطبه مرض خل يتأدب...

اما عباس كاضيها دياحة وشرب ولا صلاة ولا صوم بس مايسوي مكسورات بالبنات وما مأذي احد غير نفسه هم ابوه مايدري بي يشرب لأن يرجع بالليل والأم تغطي عليه وابوه نايم....

حوراء استغفرت ربها هددت امها تحرك روحها وهي مستحيل هيج تسوي لو شما يصير ماتفقد ايمانها بالله...

غسلت وراحت بدلت ملابسها وحظرت كتبها ولبست حجابها وعبايتها وخذت كتبها وخواتها وراحو صبحو على ابوهم...

وانطاهم مصرفهم..وحوراء كالت ما حتاجه..

ابو حمزة:ليش بويه بيج شي شبيهم عيونج حمر..ترا حالج مو عاجبني..وباوع لوجها عدل..وجهج شبي احمر

حوراء بهدوء ولزمت غصتها:ماكو شي بابا مريضة

ابو حمزة:وانه كلما اشوفج هيج تكولين مريضة وجهج شبي منو ضاربج..امج مو

حوراء:لا بابا ماكو شي فدوة الك لاتفكر بيه ماكو شي

ابو حمزة صاح:زمزم تعاااااي هنا

ام حوراء اسمها زمزم:نعم ياشيخ

ابو حمزة:بتج شبيها هاااا..وشبي وجهها هيج

زمزم:مابيها شي بتك جنها البخت شوف وجهه شحلاته يخبل

ابو حمزة بعصبية:مو كايلج ماتمدين ايدج على حوراء ماتستحين بتج صارت بطولج ماتخجلين من نفسج..ولا تدرين عنها لاهية بالمشاكل وبتج كله مريضة وتعبانة واكل ماتاكل وانتي بس دوري فلوس..اهتمي لبناتج شوي ولا تمدين ايدج عليهن الف مرة محذرج

حوراء تريد تهدي الوضع هي امها صح عصبية وماتدري عنها ولا عن خواتها بس مو لهل الدرجة ماتحبهم يعني...

حوراء:بابا والله ماما مالها علاقة بشي

ابو حمزة:امشي ولي من وجهي..لا بارك الله بيج من مرة بس للمشاكل والغثه وعايفه جهالج..امشيييي

زمزم فار دمها:ان شاء الله...وراحت...

ابو حمزة:بابا تعاي  اكلي صايرة عود خيزران من كد ماضعيفة

حوراء:بابا والله ماشتهي..وشوفني الحمدلله حلوو عل طولي..بابا عادي احاجيك بموضوع

ابو حمزة:عيوني بويه احجي

حوراء:تسلم عيونك..بابا صدك انه لعباس ابن عمي بابا فدوة كول لاء انه ماريد ازوج فدوة بابا فدوة وخصوص عباس ابن عمي

ابو حمزة يريد يسحب حجيها:ليش بويه منو كلج راح تاخذين عباس..وبعدين شسامعة عن ابن عمج شبي حتى ماتردينه

حوراء:بابا فدوة ماريده..ماريد اتزوج ابداً مافكر بالزواج هسة كله عمري 16 سنة واريد ادرس انه اريد اكمل السادس

ابو حمزة ضحك:ومنو كلج انه انطيج لعباس هذا.. حتى لو ابن عمج مانطي واحد صايع شنو بتي لاكيها..هاي حجي امج موو

حوراء:اي ماما كالت انتي لعباس ابن عمج هو عمي حاجي بيه صدك

ابو حمزة:اي هو كال عنج..على سالفة خواتج مانطيج لأي احد..انطيج لصايم مصلي مو عباس..لتفكرين بويه مانطيج لعباس وهسة بعدج زغيرة مو وكت زواج..الله كريم نشوف نصيبج وين يوديج..اكلي لكمة كبل لا ترحين مدرستج وماعليج بحجي امج ميهمها غير الفلوس

حوراء ابتسمت لأبوها وباست خده:فدوة لكلبك بابا..بعد تأخرت مالحك آكل بالمدرسة آكل...

طلع فلوس ونطاها وكلها لعد اخذي مصرفج...وراحت طلعت ومشت سريع....

هي مدرستها مو بعيدة كلش وتتمشه الها وابوها يخاف عليها من المشي جم مرة كلها احطلج سايق لو اخوج يوديج ويرجع.. مدرستها تختلف عن مدرسة البنات...

ظلت تتمشه  وهي تحس بلا طعم هالحياة وكئيبة وكلها غدر وخيانة وناس وصخة..وناس تاكل ناس...

وكلمن يجري وره مصلحته ومحد يهمه شنو وفاء شنو اخلاص شمو امانة شنو صدق شنو براءة...

توصل المدرسة وكالعادة ساكته طول الوقت بس بالدرس تحجي..

حتى صديقات ماعدها ماتحب تصادق وحدة..وكل المدرسة يكلولها المعقدة...واكو بنات من تجي يكولن هلا اجت مرت الشهيد عود يشاقن...

بس هي ماترد عليهم ابد ماتهتم لحجيهم...

خل نروح بيت الشيخ هشام...

طلع من البيت يريد يروح يصعد سيارته وشاف الطول الي يحبه وفخور بي..واكف كباله ببريته وسلاحه وابتسامته الي يحبها واالي اطمن كلبه...

عزام بأبتسامة:كواك الله ياشيخ

هشام بأبتسامة:الله يكويك يانور عيني وحزام ظهري

عزام راح حضنه حضنت زلم:شلونك يا اسد

هشام وخر عنه وهو لازم جتافاته:بخير بشوفتك يانظر عيني..مشتاقلك ياخوي

عزام :والله انه الي مشتاقلك ياخوي شلون احوالك..امي وابوي وكرار البنات وخيتي ام كرار وجهالي مشتاقلهم

هشام:كلهم زينين الحمدلله بس محتاجين شوفتك بس

عزام:الحمدلله عساهم دوم..ايمان راحت بيت عمها مو موجودة مو

هشام:راحت ورجعت تدري هي مالها غيرك ياخوي وحقك المرة تبزع الزلمة بلسانها بس تحمل لخاطر جهالك وهي يتيمة مالها احد غيرك..ماريد جهالك يشتتون ببيوت العالم

عزام تنهد:بعد هاي آخر فرصة الها..اذا تجاوزت عليه هل مرة وحق علي اميري بعدها اخذ جهالي وكلعتها تولي وين ماتولي

هشام ضرب جتافاته:طول عمرك معدل وابن معدل وتربات اسد ياخوي..اعرف اخلاقك واعرف ماترضه على كرامتك واهم شي للزلمة كرامته..يالله تعال ادخل..شكد فرحتني بجيتك

عزام:والله مشتاقلكم كلكم..خصوص لبت ابوها ام لسان

هشام:ههههه بربك هاي مال واحد يفاركها

عزام:اي والله مشتاقلها موت...

ودخلو سويه داخل امه بس شافت ركضتله بلهفة وتبوس بي وتشبكه حيل وظلت دموعها تنزل من الفرحة رجع بسلامة...

اخته رقية استقبلته هم بالأحضان وجهاله همين وهو يشبك بيهم ويبوسهم...وراح لأبوه سلم عليه وباس راسه وخطية ظل يبجي من فرحته برجعة ابنه بسلامة...

وبعدين اجت ايمان سلمت عليه وهو رد بهدوء...وراح لغرفته يسبح ويبدل ويرتاح...

ايمان حضرتله ملابسه والحمام...

سبح وبدل وراح طلع كعد يم اهله ويسولفهم عن الي يشوفه هناك...

كرار اجه:سلام عليكم..هاي عمي عزام..وراحله حضنه وباس راسه..شلونك عمي والحمدلله على سلامتك

عزام:الله يسلمك بعد عمك..الحمدلله يم ربك

كرار كعد يمه:عساك دوم..اكول الديره منوره اثاري بطل الابطال هنا

عزام:هذا نورك كروري..ويضرب على ظهره خفيف..ماشاء الله شني هالعضلات

كرار ضحك:ياعمي والله تركت الجم ماطولت هواي بي..بعد تدري ابن اخوك بطول الحايط هههههه وطالع على عمي وابويه زلمة ضخم

هشام:اي ماشاء الله عليه ما عبالك عمره 19 سنة لتكول 25 سنة..راح ازوجه حتى اشوف جهاله يعوضني عن اخوانه الراحو

كرار بثقة:هلا بالشيخ هلا..مثل ما وصيتك يابه لا تقصر

عزام:الله يحفظ شبابك..بس مو صغير عالزواج والمسؤلية بعدين تتندم بعد عمك صدكني

رقية اختهم:شكلك متندم بعد اختك هههههه

عزام:اي والله خيتي لو باقي حر عزوبي احسن..ويباوع لإيمان الي كاعدة وساكته وتباوعلهم يسولفون وماتشارك...

كرار:عمي وداعتك بس خل تصير الي يا ندم يابطيخ انعل والديه للندم

هشام ضحك:متحمس العاشك..تزوجت بعمره وحتى مجنت شايفها قبل الزواج بيوم العرس شفتها

عزام ضحك:منو هي هاااا ولك كرير كبرت وعشكت

كرار سوى نفسه سايح:اوووف ياعمي ياهو يمرض العشك ويسوي سواية ماتسوى ويوجع الكلب ويخليك مشتاق ليل ونهار

رقية عمته:ههههههه ماع علينه روميو

كرار يقلد عليها:اي ووميو ههههههه

رقية:شلب ليش تحجي على عمتك

كرار:ووحي عمتي..عيوني الموكبة(روحي عمتي عيوني المركبة)

هاي يقلد عليها لان شوي عدها مشكلة بلفض الراء وهو خبيث يعلق عليها ونهار كله عرايك هي وياه هههههه...بس تحبه تموت عليه وهو هم وكل اسراره يمها واحد يفهم الثاني...

هي عمرها 20 فرق عنه سنة وحلوة تجنن وبيضة بس كصيرة كلش ماطالعة على اخوانها وخواتها..عيونها سود والشعر اسود طوييل هم مو مثل اخوانها...

تشبه هاي👇 كلش نسختها



كرار يشاقه مرات يكلها لكوج انتي يم المسجد ويشاقه وهي تضحك وتكله (جندله)

(هاي عمود خشب جبير وطويل نسمي جندل😂)

عزام ضحك:كرار عوف خيتي ترا ماقبل عليها منو راح يشيل هوسة عرسك غيرها

كرار:المصيبة اسمها يبدي بالراء يعني الي يسألها شسمج تكله وقية واسمي كواو ههههههههه

رقية:عابت جندل اسكت لا اكوم اكفش شعرك

كرار:مو احسن من قنينة الغاز الكصيرة

رقية:والله الحكومة راح تجينه تكول بايكين عمود كهرباء عدكم طلعوه ههههههه

كرار:والله الي يشوفج واكفة بالباب يخمطج عباله قنينة غاز جديدة

رقية:هشام شوف ابنك تره مصخها انه عمته شني هاي..زوجه بسرعة خل يعوفني بحالي

كرار:وتردين اكلج عمه لو شنو هههههه

هشام وهو بيده سبحته:كافي بويه تبقه عمتك احترمها

كرار حط ايده على جتافها:ههههه هو شعندي غير عمتي منو راح يركص بعرسي غيرها لا عندي خوات واخوان

رقية شبكته من خصره وهي جوى ايده:فدوة الك عمتك مو بس اركص بعرسك بس خل يجي هذا اليوم اخبص الدنيا خبص والله

كرار:تسلم لؤي بعد كلبي

رقية:ليش كله تكلي لؤي وقصي وجبار ههههه

كرار:يلوكلج....

ظل كرار يحشش على رقية وهي تضحك مرة ومرات تعصب...

وهشام تناقش بخطبة كرار ويه اخوه عزام وكرار كل شوي يكلهم شيطلبون موافقين ويضحكون عليه هشام وعزام يكلوله اثكل ولك 😂......

بالليل...

راح لغرفته وانسدح بالسرير وهو يباوع لإيمان تدور بالغرفة مايعرف شجاي تسوي تروح منا واطلع اشياء منا وتحطهن هنا...

عزام مايريد يحاجيها بس دوخته...

عزام:شسوين سطرتيني

ايمان بدون ماتباوعله:وشيهمك انته

عزام:بدينه بطولة اللسان

ايمان:هسة شكلت حتى طولت لساني..اشو كتلتني ورحت وحتى اتصال ماتصلت..رحت لبيت عمي ولو ما ضيمي هناك هم ارجع بس شسوي حظي الاسود ماعندي غيرك..ودموعها طاحن ومسحتهن

عزام انقهر عليها هو مهما يكون يحبها وام جهاله...

عزام:تعاي

ايمان بصوت مخنوك:شنو تريد

عزام:حظج اسود ولج..بدل ماتكولين احبك ورجعت لأن ماكدر اعوفك تكولين لأن ماعندي غيرك

ايمان بجت:هو هذا الاصخم من حظي احبك وماكدر بدونك ولا جهالك يكدرون بدونك

عزام كام الها:ولج لو ما لسانج الي يكنس ويرش جان هاي كله مايصير بينه..تعرفين شكثر احبج بس لسانج مخرب كلشي

ايمان مسحت دموعها:شسوي هاي تربيتي خايسة وماعرف اتغير لساني ماكدر الزمه لا ام الترشدني ولا اب الينصحني

عزام:تكدرين تكدرين..ومو انه صرت الج ام واب بس الظاهر مو تارس عينج..وشكد اعلمج وانصحج مايفيد وياج

ايمان :لا ابد مو هيج..عزام احبك واموت عليك وماريد افقدك..ولساني والله راح احاول اتغير

عزام: يالله نشوف..بس خليها ابالج هاي اخر فرصة بعد ماتحملج ولو مو احبج..ما اطلكج لاء اتزوج عليج واكسر غرورج هذا

ايمان سكتت وهي تباوعله بعيون مقهورة...

ابتسم وحضنها....

شيخنه دخل لغرفته وباوع للأنسانة التعبانة طريحة الفراش اغلب وقتها لو بالمستشفى...

شكثر ينقهر عليها بعدها بشبابها وهيج طاحت هالطيحة ويعرف بالنهاية راح يفقدها اول وتالي ولان الفشل الكلوي مرض مايرحم...

انقهر ونفض هالأفكار ويكول ادفع كل ما املك بس انقذ حياتها...

هي اخر طفل الها قبل لا يتكون ابطنها الدكتور منعها من الحمل كلالهم راح يضر بصحتها...بس هي ماسمعت الحجي وحبلت بي حتى تريد يصير لكرار اخ وتفرح هشام بطفل بالرغم هو كلها مانريد...

اهم شي صحتج ومكتفي بكرار الحمد لله على كل حال بس اصرت هي وصار الطفل الاخير بدون علم هشام...

وهو ماخله دكتور ما اخذها  وحتى ماخله سيد وشيخ يعتب عليهم ويكولون تابعة عدها..وسولها كلشي...

وهم انولد وتوفه الطفل الاخير وجانت بنية..وبعدها ادهورت صحتها اكثر ومنعوها من الحمل...

كبر كرار وصارت تكله تزوج وحتى خواته بس رفض يزوج عليها ويكول كرار كافي علينه...

حط سبحته ونزع محبسة وحطاهن عالميز....

فرات:الله يساعدك ابو كرار

هشام نزع شماغه:يساعدج..شلون صحتج

فرات:على الله..شنو صار على سالفة كرار

هشام:والنعم بالله..عرفت الي يريد منهم مرة..تصير بت اخو شيخ اعرفه

فرات:على بركة الله..فدوة اريد افرح بي قبل ما الله ياخذ امانتي

هشام:اسم الله يامرة تفائلي خير ان شاء تصيرين زينة وتفرحين بأبنج وجهاله ويعوضونج اخوانه الراحو

فرات:الله كريم شكاتب يصير..انه كلش مقصرة بحقوقك كزوجة

هشام:لا تكولين هيج ماقصرتي يا ام كرار نظر عيني انتي وام ابني

فرات ابتسمت: اي مو دايمة الك انه..زين ليش ماتشوفلك عروسه ويه كرار وتشوف حياتك وبلكي تسع....

هشام كاطعها ويريد يلطف الجو:ومنو تقبل بشايب مثلي

فرات:لا والله شباب وبعدك بحيلك..انه الي عجزت

هشام ضحك:ياشباب راح اطك الاربعين وشوفي الشيبات ترست اللحية والراس

فرات:لا شني شايب هنه كلهن جم شعره بيضة شيخي لاتكثرهن

هشام:بعد مو مال زواج يا ام كرار وما ابدلج بغير مرة ابداً....

ابتسمت اله...وهو همين...

بعد جم يوم هشام اخذ من عمامه ثنين..وحازم ذراعه اليمين..وعزام اخوه وراحو على بيت الشيخ حسين....

استقبلهم الشيخ حسين ابو حمزة...

الشيخ ابو حمزة:ياهلا ومية هلا بالشيخ هشام..شرفتنه ياشيخ

هشام:الشرف الي يا ابو حمزة شخبارك.....

خل نروح داخل البيت...

ام حوراء:ولك علي منو عد ابوك

علي اخو حوراء من مرت ابوها وعمره 11...

علي:مادري بس شيوخ جاينه

ام حوراء:اهاااا روح اكعد يمهم شوف شنو صاير

علي:يمكن جاين يخطبون حوروو وحتى نخلص من جهرتها

حوراء سمعت هيج وضاجت:اكل تبن هسة اشك حلكك الك واكل لبابا والله......يتبع

اليوم البارت شطوله 😌

يالله همتكم اريد تفاعل يفلش هالقصة بعدنه بالبداية لتستعجلون الاحداث...

تحياتي

الكاتبة التميمية...... altmeme313