صفحات خيالي
السبت، 13 يونيو 2020
هدية الشيخ هشام بارت 10
هدية الشيخ هشام بارت 9
الثلاثاء، 12 مايو 2020
هدية الشيخ هشام بارت 8
هدية الشيخ هشام بارت 7
هدية الشيخ هشام بارت 6
هدية الشيخ هشام بارت 5
البارت الخامس
ايمن لزم وجهه بألم وانسدح بنص التراب ويجر نفس من الألم والدم غرك ملابسه وجهه...
هشام التفت لحوراء لازمة وجها وتبجي وخايفة...
هشام:لتخافين بويه......ماكمل راحت تركض من كدامه...
شافها اختفت..اخذ شماغه وعكاله من الارض وباوع لأيمن يحاول يكوم مابي والدم يصب من خشمه وحلكه...هشام لف شماغه على راسه ولزم عكاله بيده...
هشام راح كعد يم راسه:لك انته شنو من حيوان بت عمك عرضك وشرفك ماعندك شرف انته..تفووو على تربيتك...
وكام عافه وراح اتجه للمسجد وصارت هالبنية اباله مو مشاعر لا ..بس يكول مسكينة بس لا يرجع هذا الحيوان يتعرضلها نذل ماعنده ولا ذرة غيره على عرضه يعني كلشي يسوي...
هناك لاحظ شفته مجروحة هذا النجس ضربه..وايده هم كله دم غسلها...
صلى وطلع رجع للبيت..وهو داخل سمع بالصدفة امه تحجي ويه ايمان مرت عزام وهنه بالمطبخ وصوتهم طالع...
ام هشام:يعني انتي راضية وتردين تزوجين..يمته لحكتي خلصتي حزن على ابني ولج خجلي واستحي على دمج
ايمان:عمه الله يخليج انه بعدني بشبابي وعزام الله يرحمه راح....ماكملت اجاها كف من عمتها معدل....
ام هشام:والله انتي بلا خجل ولا مستحه ابني توه دارت سنته وانتي تفكرين بالزواج..وجهالج يا مفلوكه وين توديهم واحنه بشنو قصرنه وياج كو.... ماتستحين طايحة الحظ
ايمان لازمة خدها وبصياح:عمه مو من حقج تضربيني..انه اريد اشوف حياتي واتزوج على سنة الله ماكفرت بعدني عمري 26 ليش اضيع شبابي..وجهالي اخذهم وياي
ام هشام ضربتها مرة ثانية وطاحتلها ضرب:يالماتستحين واطولين لسانج وتصيحين والله انتي وحدة حقيرة وتكوليها بكل صلافة ازوج..كله علمود انانيتج كوا...... وغلطت عليها بحركة كلب...
ايمان خبصت الدنيا صريخ....
هشام مايحب يدخل بسوالف النسوان بس مايرضه حرمة اخوه تنضرب.. عزام حطهم امانة بركبته...
دخل للمطبخ ولزم امه وسحبها من ايمان ودار وجهه لان ايمان بلا حجاب...
هشام وهو لازم امه:يمه شصاير ليش تمدين ايدج على حرمة المرحوم
ام هشام بعصبية:اتركني يمه اكسر راسها الما مرباية..لو تدري شبيها جان مشيتها بيت عمها واخذت جهالها
هشام:اي اهدي وفهميني شبيكم وشصاير تره مو ناقصني مشاكل يمه احجيلي بهداي بهداي وخلي العصبية على جنب
ايمان كامت لبست حجابها:الي ردته من حقي..بعدني بعز شبابي وماكفرت كلولي كفرت
ام هشام بنتره:اسكتي لا اشك حلكج هم اطول لسانها..التفت لهشام..المفلوكه جاين ناس ويردون يطلبونها بالله شفت..هاي بسبب الفرارة بالعزايم والفرارة بالسواكه هاي ماتنطي وجه لازم تنحبس متطلع..لو تشوفها ولا كأنها مرت شهيد..وبجت..يمه وليدي جوى التراب وهاي صبغ وميش وشعر ولبس ومكياج شيكولون العالم علينه مرت ابنهم معرسة هاااا هشام كول انته مو محروك كلبك على اخوك احجي كول
هشام تنهد:استغفر الله..الله يرحمه برحمته...هاي السوالف مال نسوان ماعليه بيها يمه لدخليني بيها.. وسالفة الزواج هاي بكيفها هاي حياتها..بس تخلي ابالها جهالنه يمنه يبقون مانخلي رجال غريب يربي جهالنه
ايمان:لا والله جهالي ماخليهم وانه حرة ازوج او اشرد شسوي اسوي ماكفرت ومو من حقكم تاخذون جهالي
هشام يضوج من صلافتها:وهذا انه كلتلج يامرت اخوي من حقج وانتي تردين تشوفين حياتج..بس جهال اخوي همه جهالي ومالهم طلعة من هالبيت..الا على جثتي..الي عندي كلته وبكيفج تختارين بين جهالج وبين زواجج
ايمان سكتت وماتعرف شترد ماتكدر تتخله عن جهالها وتتركهم لأن تخاف تخسر الورث مالهم اذا عافتهم والي جايها ماينرفض وهي طمعت بي...
هشام طلع من يم امه ومرت اخوه وام هشام تولتها حجي ورزايل وذيج تلاسن ماتسكت وكامت ام هشام كتلتلها كتله معدلة....
مرت جم يوم مشاكل وهم وشلعان كلب وهشام مو متحمل هالمشاكل كلش...امه ظلت تحن عليه وتكله اعقد على مرت اخوك بدل ماتروح للغريب وجهالنه يشتتون عنه...
هشام يكلها مستحيل يمه شنو اعقد على مرت اخوي والناس شراح تكول عني..وهذا اخوي وصلة من كلبي شلون اخذ حرمته من بعده شلون....
ومنا كرار شالع كلبه عرف هو رجع لبت العالم يحاجيها وخايف لا يسويله مصيبة وحيل متمسك بهالبنية ميريد غيرها...
كلش زايدة عليه الظغوط ويومية مشكله..والاعتداءات الي جاي تصيرله والتهديدات الي يلكاها على سيارته من يطلع مكان ومايعرف منو وراها..ويكول اكيد شخص جاي يراقبني ويريد تخويفي...
وحاير بهالسالفة ويكول ماعندي الا كل خير ويه الكل لا عندي عداوة لا عندي ناقصة وي احد ليش هيج يهددون بيه ولد الحرام...
اما حوراء مراحت المدرسة من هذاك اليوم الي تعرضلها ايمن ابن عمها ونقذها هشام منه...ومرضت كلش كل ليلة اصخن وتتحلم...وهذا ايمن ميعوفها بكوابيسها...
كلهم يتساءلون شبيها حوراء ليش متروح مدرسة وشبيها مرضت فجأة هيج...كالت لأبوها بعد ماريد اروح مدرسة ولا اريد اكمل السنة...
اتذكرو كلهم مرة حوراء صار حالها اسوء من هالحال وتخربطت وصارت كله تشوف كوابيس وت
تمرض وتتحلم وتبجي وتصرخ...
عرضوها على سيد بالهفترة كلهم مابيها شي هي خايفة من شي والسيد سألها وكلها شمخوفج كالت مخايفة من شي...
طبعا امها مهملة ما هماها ونست السالفة بعد فترة صارت شوي زينة حوراء بعد مالتفت الها..والبنية صارت انعزالية وهادئة بعد ما جانت مرحة وتضحك...
والاماية ماتهتم الا بنفسها وغيرتها من شرايجها...ابوها جان يلاحظها تغيرت بس يكول يمكن هاي مراحل بلوغها او فترة مراهقة...
هسة مرة ثانية اخذو حوراء لسيد لأن فجأة كالت بعد ماريد اداوم وهي شكد شاطرة ومتمسكه بدارستها...
السيد بيت الها كلهم البنية خايفة من شي وهم حسد محسودة...سوالها حجاب وقرأ عليها بعض ايات القرآن...
بس بقت مصرة متكمل مدرسة ومتطلع وتسجل عليها كومة غياب..وبقت بالبيت متطلع وحتى بيت عمامها وجدها متروح...
جدها جم مرة كايللهم جيبو حوراء اشوفها ماتجيني من زمان...كلوله مريضة...وهو انسان كهل ميكدر يمشي او يطلع....
بيبتها اليوم ماخذها ابنها لبيته جايبها تتغده يمهم....
البيبية دخلت وظلت تشم تشم بالهوى:هاي شنو حسين نسوانك مشعوطات الأكل من انه جيت
ابو حمزة ضحك:يمه يتراولج..همه طابخيلج اطيب اكل والي تحبينه بعد
الحجبية ام حسين:وييي عاد من حلات طبخهن كلهن عوبات..اول ما مرتك ام لسان هاي الطايحة الحظ زمزمو بت الخباز من عابت لجهرتها وجهرت امها الحية
ابو حمزة:ههههه يمه رجعنه لنفس الاسطوانة نسوانك ونسوانك
ام حسين:اي محد كلك ازوج 3 مثل ابوك ماتكعد متشبعك وحدة خوب ابوك سواهن 6 مو رجال حديد وموتهن كلهن...
ظل يضحك الشيخ حسين ومشاها كعدها بالكرسي..
اجه علي سمع حجي بيبيته:بيبي قصدج انتي الموتيهن..وراح باس راسها...
البيبية ضربته بالعوجية:طاح حظك ابن الحرباية..امك معلمتك تحاجي بيبيتك هيج..تفففوووو عليك
علي ضحك:بيبي شكلت قابل مجذب هو انتي كل مايزوج جدي يمكن تجلطيها وتموت
ابو حمزة:عيب بويه بيبيتك هاي شهل الحجي..حب راسها
آية هم اجت:هلا بيبي..وراحت حظنتها وباستها...
البيبية:هلا بعد رويحتي عيون بيبي مشتاكتلج يبعد هلي
آية:فدوة لعيونج وكلبج وروحج بعد روحي بيبي شون صحتج
البيبية:زينة يمه زينه على الله هو جدج واعمامج وابوج خلو صحه عليه
ابو حمزة:الحجية هسة راح تخرط الماضي والحاضر وتشبش هههههه..ديرو بالكم على بيبتكم رايح يجوني زلم هسة
آية:صار بابا بعيونه بيبي..
راح ابوهم...
البيبية:يمه رايح للساحرة يشوفها مو راح يجوه زلم عاف امه ومشه..اكول حويره وين والبنات شو ماكو ولا اجني الحيات يسلمن عليه امهات السحورة خذن ابني وماشوفه بالسنة حسنة
آية:بيبي بابا والله كله مشغول ماعليهن هنه
البيبيه:اي صبغي لأمج مترضين عليها عمه بعينج...كومي صيحي لحوراء....
اجت حوراء وشافت بيبيتها وراحت سلمت عليها..وماخلت رزالة مارزلتها وتكلها شدعوة جدج مريض راح يموت وماجيتي ويه اهلج....
كلتلها مريضة كلش حتى بيت خواني ماروح...
الحجية كعدت تحجي على نسوان ابنها وتكرك منا وتكرك منا وماعاجبها العجب هههههه وشبعن طن رزايل ومسبه هنه وامهاتهن...
الحجية حلوة مرحة وطيبة ومن يكعدون يمها يتشككون من الضحك احفادها لأن تحجي حجي كله بالخط العريض وتغلط غلط بصريح العبارة...
ومن تكعد تسولف سوالفها مال قبل ويه شرايجها يفطسون ضحك شمسويه بيهن..
كل ما يتزوج رجلها عليها تشردهن اول جان مزوج 4 ماتت وحدة تزوج مرة ثانية وماتت الي تزوجها اخر شي كام تزوج اخر مرة....
وحدة مخلفت والثانية خلفت ٣ وماتت وهسة قبل جم سنة ماتت وحدة باقيات عنده ثنين بس ام حسين وام صادق...
وعنده جدهم خير ولد كومة وبنات من 3 نسوان عنده تقريب 18 ولد وبنات كلهم مجموعهم هاي....
خل نرجع للشيخ...
طبعا كاعدة امه يمه ونفس الموضوع مال ايمان فاتحته بي وهو ضاج من ملحة امه عليه...
كرار توه راجع من الكلية... وسمع ماعجبه ابوه يزوج مرت عمه ايمان يعرف هالنوع مراح يفيد ابوه ولا راح ترهم وياه وهو ابوه يكضيها من ضيم لضيم ميصير...
لذلك معجبه وماقبل ورفض كدام جدته وكال انه ماقبل ابوي يزوج مرت عمي وعافهم وهو معصب....
وانقهر على امه وعصب كلش وراح خابر على نسمة هي الوحيدة الي اطلعه من قهره وضوجته...
رقية طلعت تريد تروح تطلع للبيت اكيد الخط اجه كامت تمشي سريع ومتشوف كدامها وهي تباوع لساعتها صدمت شاب وياها بالقسم....
اعتذرت حيلل منه ودنكت اخذت سجل الطاح وراحت وهي تمشي سريع....
هو جان فاهي بوجهه منتبه انو السجل الي وكع اله وهي عبالها مالها وخذته وياها...باوع مابيده شي...
جان يكول لا خرررب خذت سجل مالتي..وراح طلع يدورها ماكو رايحة....
رجعت رقية للبيت ودخلت شافت امها واخوها كاعدين بالصالة...
رقية:سلام عليكم
هشام وامه:وعليكم السلام
كعدت بالطقم يمهم وحطت جنطتها وسجلاتها بصفها...
رقية:وين كرير
ام هشام:راح لغرفته وهو معصب روحي شوفي
هشام:عوفوه بحده مابي شي
رقية:ليش شصاير ليش معصب بس لا سالفة هالبنية مرة ثانية
ام هشام:سمع اخوج راح يعقد على مرت اخوه
هشام كام:يمه سدي الموضوع رجاءاً ولتفتحينه الله يرضه عليج كتلج رأيي ومابدله
ام هشام كامت:يمه ليش ماتفهمني هاي ماتستحي وراح تزوج واخوك توه يالله دارت سنته وراح تاخذ جهال اخوك مراح تقبل تعوفهم اعرفها خبيثة راح تلجأ للقانون على ابو هي امهم
هشام:وتلجأ للقانون..انه عمهم والوصي عليهم وجهال عزام ميطلعون شبر من البيت ويه احد ويربون تحت ايدي وكدام عيني..عن اذنج يمه....وراح عافهم وطلع...
رقية كامت:يمه ليش تلحين على هشام والله خطية مو كافي المشاكل والظغوط عوفي بحاله لا يصير بي سكر وظغط من كثر القهر
ام هشام:انتي لتتفلسفين براسي امشي ولي بدلي وتعاي صبي غده هاي الحية تنتظرج حتى تصب....
وراحت الحجية...
رقية:الحمدلله والشكر كل الي بالبيت عصبين بس هشومي فديته حتى بعصبيته يحاجيني حلو مو مثل ابنه وامه العصبية حتى ايمانو صايرة كبريت افففف وكلها تنفجر بوجهي....
ام هشام صاحت:كافي تكركين ويه روحج امشي ولي بدلي
رقية:بسم الله يمه خرعتيني منين طلع صوتج....
وراحت بدلت ونزلت ساعدت ايمان وذيج مبوزة ومتتحاجه صبو غده وجهزو السفرة...
راحت رقية تصيح لكرار بغرفته...دكت الباب وسمعت صوته كال تفضل...
رقية دخلت:كروري كوم تغده عمري
كرار جاي يدرس:ماريد
رقية:ليش عمري شبيك مريض
كرار:مابيه شي ولا مريض بس ماشتهي
رقية كعدت يمه:كوم كرير عن الدلع تدري ابوك وامي وابوي مياكلون اله انته يمهم
كرار:دلع بخشمج بطريق..خلي هو يتغده بحده ماريد انه
رقية:انجبي جندله لتكلي بطريق وكوم تغده غصبن عليك..هاي كله لأن امي تكل لأبوك يزوج ايمان ترا ابوك ماقابل شبيك
كرار:لتخافين هسة بيبيتي تاكل كلبه لمن تخلي ينفجر ويقبل
رقية:حبيبي كروري ترا ابوك هواي عانه بحياته من حقه يشوف قسمته ويرتاح وبلكي يصير عندك اخ..لتصير اناني ترا خطية ابوك والله ينكسر كلبي عليه شكد تعب ومازال يتعب
كرار:انه اناني..انه ماريد يتزوج ايمان مرت عمي هي ماترهمله واكيد تشلع كلبه..لو هسة يختار بت بيت ويزوجها ماعندي مشكلة اصلا افرحله بس ايمان شرانية متلوك على ابوي راح اتعبه وهم ماهاين عليه عمي عزام الله يرحمه شلون يقبل ياخذ حرمة جانت ويه اخوه بنفس الفراش
رقية:الله يرحمه بعد كلبي اخوي اروحله فدوة حرك كلوبنه وراح بس هاي قدره الحمدلله على كل حال..واذا على هل السالفة سهلة يعني يكدر ابوك يزوج الي يريدها غير ايمان
كرار:منو مايريد حتى لو صفية جيرانه
رقية خربت ضحك:يبووووو عاد صفية يبوووووو ههههههههههههههه ولك تخيل ابوك ويه صفية هههههههههههههه يمه بطني صفية ههههههههه
كرار ضحك:اي شمالها تحبه خطية هم عدها كلب مثل الناس..المصيبة كلما تشوفه..ويقلد صوتها.. تصيح الوحن فدوة للشيخ
رقية ماتت ضحك:الله يلعن بليسج صفية..وهو شيكول
كرار:هههههه شيكول..يكول الحمدلله والشكر الهي
رقية:هي خطية مو بس ماتلفض نص الحروف مو بعقلها اعتقد والا اكو مرة عاقلة تصيح الوحن فدوة للشيخ كدامه هههههههههههه
كرار:لج المصيبة هم تحب..بس خطية بس اصير دكتور اصلح اسنانها ببلاش ههههههه
رقية:عفية وسويلي تقويم وها دير بالك عليه
كرار:اي نسويلج تقويم بس مو بلاش بفلوس وهم بلكي ينعدل لسانج وتلفضين اسمي كرار عدل مو كواو
رقية:عابت هالجهرة هسة انته صير دكتور حفار اقصد اسنان وبعدين الله كريم انطيك بس اجرة المخدر
كرار:تففف عليج وعلى فلوسج عود تحششين بايويويويولوجي من الفض الأسم يصير عندي تقيأ بالدماغ
رقية:تف عليك تره عمتك انه واكبر منك بسنة احترمني شوي من عابت
كرار:اي خوش راجعيني بالمكتب بلكي تحصليلج ورقة احترام...خاب كومي لبسي الباب دوختيني اريد ادرس
رقية صغرت عيونها:تدرس او تروح تسخت ويه الحبيبه
كرار:كيفي شعليج اسخت ويه حبيبتي اشكك الملازم اطفر من السطح معليج بيه بطة
رقية:اي اي اعصابك جنادل
كرار:كومي ولي ولبسي الباب يالله اذا جبت اقل من جيد جدا او ممتاز تطلع بيج ترا
رقية:حرام عليكم كله اطلعونها بيه والله حرام بت البطة السودة انه
كرار:لا انتي مو بت البطة السودة انتي لكاج جدي يم عبدالله يس(ياسين)
رقية:ههههههههه هنوب عبدالله يس(ياسين) منو
كرار:هذا يبيع طمامة بستوته ودوم يجي وقت ما انه نايم ويصيح طماطة طماطة حمرة كيلوين بألف ادري بيها حمرة قابل زركه يعني
رقية:وانته شبيك مظغوط ههههههه رزق الرجال هذا غير يصيح حمرة
كرار:هو طماطته خايسة مثل وجهج..يالله لبسي الباب
رقية:عابت بالله هشام شحس من شافك توه صاير
كرار:وزع خرفان للبيوت..اما انتي جدي وزع نعوله للحفاي ههههههههه
رقية راحت فوكاه وظلت تجعص بي عساس تذب ثكلها عليه وهو خربان ضحك هي قزمة وضعيفه....
كام طلعها كوة بره..راحت شافت امها معصبة وساعة تصيح تعاي للغده وصيحي لكرار...كتلهم كرار ميريد...
بس هشام مكعد يمهم عالغده وبالديوان...
بعد الغده غسلت الماعين رقية لان عليها راحت لغرفتها تراجع شوي وتدرس...
راحت شافت سجلين عالميز مال لابتوب...راحت فتحت واحد منهن تشوفه..وكلبت بصفحاته مو الها هالسجل..وتذكرت خذت سجل الولد وياها بالقسم...
وكالت يااا عزااا والله فشلة اويلي يمكن هسة ظال بلا محاظراته.يبووي صخام بوجهي غبية وفاهية وعوبه....
رادت تسده طاحت منه ورقة رفعتها من الارض ونصدمت بلي بيها.....يتبع