البارت العاشر
وصلو بعد طريق طويل ومتعب...وكفو كدام البيت ونسمه بس ترجف خوف ومن البجي خلصن عيونها...
اول مافتحت الباب ونزلت ونزل كرار وهشام ويردون يدخلون البيت...
نسمه من الخوف اختفه الضوى بعينها والحيل راح منها وطاحت عالارض مثل الجثة.....
كرار اخترع ورفع عن وجها البوشية ورفعها من الارض...
هشام:لاحول ولا قوة الا بالله..دخلها جوى
اخذها كرار ودخلها جوى وتفاجئو بي من دخل وياه بنية بيده شايلها....
ركضتله بيبيته ام هشام وظلت تعاتبه مرة وتبوس بي مرة الخ وتبجي...ورقية هم ظلت تبجي من شافته...
وهو ظل ساكت مايحجي..وبعدها حط نسمة بغرفة رقية...
وبعد عتاب وحجي بقو كاعدين سويه شكثر اما هشام عافهم وطلع لديوانه وهو يحرك بروحه يريد تنحل هالسالفة بأسرع وقت....
صار العصر وماشافو هشام اجه للبيت والكل عرف كرار رجع الفضل لإيمان الحبابه الطيبة 😒....
واجو اهل البنية هداده ويكولون طلعو بتنه نريدها ويردون يغسلون عارهم بكرار وبتهم سويه...
هشام رجع للبيت ولكه حازم لازم سلاحة بوجه هذول وكلهم بالباب...
ما نطاهم فرصة وكلهم ماعاد عدكم بنية انسوها صارت بتنه والي يقرب ناحية ابني امحي حتى غباره....
واجه شيخ حسين وهدا الوضع وكلهم نحلها بهدوء بدل السلاح وزهق الارواح بالباطل...
ونجر كرار للتحقيق بالمركز وياه نسمه طبعاً...واهلها تخبلو وكل شوي واحد من اخوانها يريد يهجم عليهم ثنينهم ويقتلهم....
بس بالمركز طردو اخوانها بره المركز لمن يكمل التحقيق...
كرار كال اني مانهبتها هي مشت وياي بإرادتها ومالمستها ابدا وهسة صارت مرتي بعقد سيد بس محكمة لا....
وصار تحقيق ويه نسمه والاهل فايرين دمهم نار...هي اعترفت بأرادتها مشت وياه وهو مالمسها....
المهم اختصار للتحقيق خذوها للطب العدلي يكشفون عليها حتى يتأكدون هي بنية بعدها حسب كلامهم...وطلعو التقرير بعد ما كشفت عليها دكتورة...
وطلعو تقرير وثبتت هي عذراء مالامسها ابداً..وبما انو هي رايحة وياه بأرادتها وهي مو قاصر بالغة العشرين وصارت زوجته شرعاً...
وبألف ياعلي خلص التحقيق..وتنازلو عن القضية بفضل شيخ حسين...
تم اسقاط التهمة ضد كرار واخيراً خلص التحقيق جان كابوس بالنسبة لهشام... وكل لشيخ حسين فضلك دين بركبتي مانساه...
كله شهل الكلام خويه..انته غالي عندي وماترخص ابد...
بقت كعدت الفصل ونعقدت الكعدة وصار حجي ومشاكل وصياح ومداحر..واهل البنية كالو نريد نقتلها جابتلنه عار....
شيخ حسين خرس اخوانه عن الكلام وكلهم محد يحجي...وخلصت الكعدة وصار فصل نسمة 50 مليون لا ينقص ولا يزيد....
هشام كال مستعد ادفعهن وابني ميصير اله شي...ومنعوه من ذيج المنطقة هو وعائلته وعشيرته كلها....
وتبرو من بتهم وكالو مانعرفها ولا عدنه بنية واذا تجي ناحيتنه نفرغ سلاح براسها....
هل ايام جانت صعبة وهشام مينام ودفع فصل ال50 مليون وحازم كله عليه 25 مليون ولا تحزن يابو كرار انته اخوي مو بس ابن عمي بس هو ماقبل وكال مشكور ماتقصر على راسي انته بس هاي سواية ابني واتحملها....
وبقه هشام ميحاجي ابنه مرت عليه اصعب ايام...ونسمه صايرة عود خيزران وماتاكل وبس تبجي كاضيتها مناحة وتنام يم رقية وهي دوم تحاجيها وصارت مقربة منها....
بس ايمان دوم تشمر حجي عليها وام هشام هم ماتحبها لنسمة تكول جابت عار لأهلها وبسببها كرار سوى هيج بأبوه...
بس جده ابو هشام ميهمه المهم حفيده بخير ماعنده غيرهم هو وهشام بعد همه الي بقوله بهالدنيا...ودوم يكول وين مرت ابني كرار وتروح يمه ويسولف وياها وينصحها ويشجعها انو همه وياهم ميعوفوهم...
واثق بالشيخ الي رباه طول هالسنين وسمعته تبقه هي هي ماتتغير...
هشام مايكعد يمهم ابداً كله بالديوان حتى صار ينام بي وكرار راحله جم مرة اعتذر ويبوس راسه بس هشام مايحاجي...
صارلها السالفة بال3 اسابيع تقريباً هشام مرض كلش وكله صداع ملازمه ومرات يصير كلش يتأزم عليه الصداع...
مع انو احترامه ماتغير كدام الناس وهيبته هي هي ماتغيرت بس كلما يشوف احد يستصغر نفسه بسبب فعلة ابنه ويكول اكيد ينتقدون تربيتي لأبني....
كرار اجل هالسنة من الكلية هو ونسمة..وظل يروح ويه حازم وين ميروح ويساعده بكلشي..هم يسلي نفسه وهم يتعلم يعتمد على نفسه....
ام نسمه كلش مريضة وصارلها ايام معلعله وطلع عدها تشمع بالكبد وهاي مو من هسة المرض بيها...
ومرت ايام ونسمة بدت تتعود على بيت عمها وكلما يجي هشام تتلكاه بكلام حلو وبأحترام...
وهشام اخيراً حاجه ابنه بس مو مثل قبل وكرار فرح جان مكتئب لان ابوه مايحاجي...
كله سمعت بعدها مرتك يم رقية بالغرفة...خلي مرتك تكعد وياك بالغرفة بعد ليش تنام يم رقية..وكله وصي على اثاث جديد لغرفتك...
لان غرفته مال شاب عزابي بيها سرير شخص واحد...فذلك راح يجيبولهم اثاث عرسان...
كرار تحمحم وكله صار بويه..وعافه هشام وراح...
وجابو اثاث جديد ورتبوها رقية سوتها الهم مثل غرفة العروس وفرحانة لكرار وتحشش عليه وهو يكلها راح اصير بستان جنت حديقة وتضحك هي....
رقية اخذت نسمه وامها وايمانووو وراحو للسوك تشتريلها جم شغلة لأن ماعدها اشياء بسيطة وراحت جهزتها واشترو كومة شغلات الها....
وهي رغم حزنها على اهلها بس اعتبرتهم همه اهلها وصح ام هشام دوم تحجي عليها وتزمخ بوجها بس سعيدة برقية شكد حبابه وتحبها....
وذيج ايمانو هم بس تشمر حجي عليها...ونسمه تسمع الحجي وتختلي بنفسها مرات وتبجي بحركة ومشتاقه لخواتها وامها...هي صارت تلبس بوشية اي مكان تطلعله...واصلاً ماتطلع مكان...
رجعو من السوك وهمه تعبانين ورقية رتبت نسمه هي حلوة بس حفتلها بهل الفترة كلش هاملة نفسها وصايرة ضعيفة كلش...
وعقدولهم محكمة وصارت زوجة كرار قانوناً وشرعاً..واليوم راح تكون بغرفة كرار بحدهم بعد...
صار الليل ونسمه كاعدة يمهم متوترة تعرف اليوم اذا راحت يم كرار راح يكمل زواجهم اكيد..لذلك متوترة...
ايمان:شبيج عيني مستعجلة يجي ياخذج كرير..لاحكه عيني لاحكه
رقية:ايمان انلصمي البنية خايفة
ايمان ضحكت:متوترة يكلبي وانتي مشيتي وياه ماخفتي
نسمه عيونها دمعت وسكتت ماجاوبت...
رقية:ايمان ترا حجيج هذا احطه بحلك امي عوفي البنية بحالها
ايمان:اوووي خوفتيني عيني..اكول حبي نسومه تحتاجين تتعلمين لو اصلاً ميحتاج اكيد عندج خبرة وياه بعد ماقصرتو سوالف صارلكم سنتين مووو لو مووو
نسمة دموعها نزلت وكامت راحت لغرفة رقية وظلت تبجي بحركة وماتعرف شترد على ايمان هذيج حية ونسمة فقيرة ماتلاسن اصلا بيا عين تدافع عن نفسها بعد الصار كله...
رقية:والله اسمع هشام حجيج هذا ترا مهما يصير مايقبل على كرار..وكامت عنها وراحت وره نسمه الي جاي تشهك بالبجي...
رقية:ماعليج بيها ولج لا تسوين هيج..لو اسولفلج شسوت حتى تاخذ اخوي الله يرحمه..مسحي دموعج ولج
نسمة ببجي:صدك حجيها اني عار وجبت العار لأهلي حتى لو كلبي وشرفي نظيف محد راح يصدك هسة انتم حاطين وحدة عار خانت اهلها بيتكم ومزوجيها لابنكم هم حقكم
رقية:لا ولج ابد مانفكر هيج انتي حبيتي وهو حباج واهلج سوو هيج بيكم...انسي الي راح والناس بمرور الوقت راح تتأكد من اخلاقج..وانتي بيت الشيخ هشام منو يتجرأ يحجي عليج..ماعليج بايمانو هي اخر وحدة ممكن تحجي عليج وتنطيج نصيحة..جانت معلعله اخوي الله يرحمه وهسة خذت هشام كلنه بلكي تعلمت درس من حياتها السابقة بس نفسها ذيبة ماتغيرت...بس شحدها تحجي حجاية يم هشام..شايفة هاي البنكه يعلكها بيها ويشغلها على 15 مو خمسة ههههه
نسمه بدموعها ضحكت:جنج كرار بس يحشش ويضحك..هو حيل يحبج كله يسولفلي عنج جان
رقية:صدك شيكول بالله
نسمه:هههه مرة كلي عندي عمه تخبل بس قنينة غاز وتصيحلي كواو
رقية صغرت عيونها:امممم الحقير اني اله واني كاعدة اصبغ بمرته اله الخايس
نسمه:لا فدوة لتكليله كتلج فدوة
رقية:وهاي لخاطرج..يالله تعاي امشي لغرفتج بعد لا تجين هنا..وبمزح..عابت بعد لا اشوفكم لا انتي ولا كرير الغثيث بعد عدكم غرفتكم..ادري بي يتسحب نص الليل ويجي يمج المايتسحي واسمع الامححح ههههههه
نسمة:عزززااا هاي انتي كاعدة من يدخل هنا
رقية:هههههههههههه اي واسمعج تكليله كرار كوم روح لاتكعد رقية ماتدرون رقية تسمع كلشي وكلاشي وهمزين ماسوه شي غير الامححح ههههههههههه
نسمه:يمممه عزاااا والله فشلة فضحني كرار يايمه
رقية تضحك: عادي هو كرير منحرف اعرفه..تعودي عليه بعد هسة بويه يجلط من يلطش
نسمه دنكت راسها:هو انه شعندي غيره بعد لا ام ولا ابو ولا اخ ولا عشيرة
رقية:هو زوجج وهو امج وابوج واحنه اهلج..وهشام اعتبري هو ابوج والله فد حنون وحتى لو تصادم بي الدنيا ميتغير يبقه طيب وحنون وكرار طالع عليه
نسمة:والنعم منه شفت تعامله وياي بهل الأيام ودافع عني من اهلي يردون ياخذوني لو رجال غيره جان شمرني لاهلي ومايورط نفسه..الله يحفظه الكم
رقية:شلون لعد بعد محسوبة علينه انتي صرتي مرت ابنه وان شاء الله ام احفاده....
رقية بعد سوالف وياها خذتها لغرفتها كلتلها رتبي نفسج وكأنج عروس...
نسمه خذت بحجيها بس متوترة حيل لأنها راح تصير هي وحبيبها جسد واحد وخجلانة منه شلون راح تصير....
بقت منتظرته وتسمع سوالفه ويه بيبيته وجده بره لأن من زمان اجه...وشوي سمعت صوته اختفه......
هشام كاعد بديوانه وراسه صداع كلش...
كرار اجه ودخل:كواك الله يا شيخ
هشام رفع راسه وبهدوء:الله يكويك
كرار باس راسه:بويه بعدك شايل بخاطرك عليه والله صعبة عليه هاي.. انته كله تحاجيني ببرود ماجنت هيج
هشام باوعله بنظرة محاسبة:والي سويته شوي برأيك وتظن ينسي..لا يظل ينحجي بي سنين مو هين
كرار:اسف اعتذر يابه للمرة الخمسين اعتذر منك..والف مرة فهمتك موقفي افهمني بويه انته اكثر شخص يفهمني بدون ما احجي
هشام:الله كريم الله كريم..شعندك جاي يمي وعايف عروستك
كرار بجذب:بصراحة بويه جيتك لان متوتر ماعرف شسوي ومستحي مدري شلون اكلك..وانه كلشي ماكو ماعرف شي تره يابه..
هو جذاب اصلاً لا متوتر ولا شي بس يريد حجة حتى يحاجي ابوه لان ميحاجيه هل كثر وشايل بكلبه...
هشام:واصدك طالع وداخل انته وراح تصير دكتور وفاهم ومتعرف شي وانته رجال ومتوتر لعد البنية شتكول
كرار:يابه وغلاتك ماعرف شي ههههههه..هسة شلون اروح اصخمها يعني واخررب ما اعمر..وانه ابن الشيخ هشام يرضيك يكولون ما فلح بيها
هشام:كوم على حيلك وروح لمرتك وصير زلمة ولا تسوي سوالف النسوان..كال ميعرف..انته ابليس اجه ياخذ دروس منك..كووم يالله
كرار ضحك:لعد خوش رايح اجيبلك العيد يابه..تحمست تره كلش
هشام: لا تتهور ياولد اكعد خل احاجيك امري لله ولو ما مقتنع انته ماتعرف شيطان انته....
وكرار كعد يستمع لأبوه وكلما حجه شي يكله يابه يعني هسة هاي جانت فعايلك واخزياه ياشيخ....
كام طرده هشام من الديوان وكله صوج الي يعلمك كووووم وكرار ميت ضحك...
وراح توجه لغرفته ودخل وهو مبتسم...وشاف نسمه كاشخة ومن شافته دخل دخلت جوى اللحاف تغطت...
كرار ابتسم:هلا بالعيد..حبيبي الليلة الي وبغرفتي..ياويلج الطيش كله يطلع الليلة..اروايج زلمة الشيخ وشجاب
نسمة خافت كلش وظلت تبجي:لا اروح انه انام يم رقية
كرار راح الها وضحك:ولج هاي شبيج ليش البجي..اشاقه وياج حبيبي بعيوني انتي
نسمة بدموع:خااايفة
كرار:افى افى خايفة من حبيبج كرور
نسمة هزت راسها بأي وبعدها تبجي....
كرار حضنها:اروح فدوة ونذر لحبيبي الحلو..لتخافين يروحي ماكو شي يرعب..هو بس راح تشبعيني رفس ودفر ويجون الامم المتحدة ينقذوج ههههه...
نسمة زادت بالبجي وجهها اصفر صار....
كرار خررب ضحك:لج والله اشاقه شبيج..اشوف تعاي بحضني..ونام عالسرير ونومها بحضنه وهو بعده بدشداشته..اووف شكد انتظر هاليوم الي نصير بي شخص واحد..احبج ياروحي انتي ولتخافين بعيوني نسومه الحلوة
نسمة مسحت دموعها وبعده التوتر:وانه اموت بهواك كرار ماعندي غيرك لا تخذلني بيوم وتكسر كلبي..انته بقيتلي بس.. وماعاد عندي اهل وعزوة
كرار:اصيرلج شتردين واني عزوتج..ومنو يخذل حبيبته الي ضحت بأهلها علمودي
نسمة:يعني ماراح يجي يوم وتشمت بيه وتكلي انتي شردتي وياي
كرار:اشو ماتعرفين تحجين حبيبي شهل الخرط..سدي حلكج حبي الليلة ليلتنه خلينه نعيشها بحب...
وكام نزع دشداشته وفانيلته وبقه بس بالشورت...وحضنها بيديه وتغطو بقو يسولفون شوي...
وصار يتقرب منها شوي شوي وهي خايفة ومتوترة وطلعت روحه كلما يريد ياخذها تبجي وتبعده...
و3 مرات هيج تسوي بي اخر شي بعد ضاكت بي منها ومن خوفها هذا...واخذها برغم خوفها وتوترها...
وظلت تصرخ سد حلكها فضحته 😂😂😂 وجاب العيد كرار وذبح الطلي ضحية هههههههههه....
لا ماخربها بس ذبحو الخروف المسكين 😂😂😂😂....
وكضو ليلة رومنسية حلوة...
(اشو ماكو طرد بهالقصة🤔 شكلج تميمية كمتي تخجلين من الكيبورد 😂😂😂😂 يالله مشوها اعوضكم بغير مرة 😁)
يوم ثاني الصبح باركولهم وفرحو بيهم وحتى ام هشام جانت مقهورة منها بس هسة فرحت لحفيدها...
وهشام هم رغم قهره فرح الهم ويتمنى يصير عنده حفيد يعوضه عن فقدان جهاله الخمسة...
خل نروح لحوري😊 اووي اشتقنالك....
جاي تغسل الملابس مالت اخوها الزغير..ظل يبجي صاحت اية..مروة شوفو مسلم ليش يبجي هسة اجي...
ولا وحدة جاوبتها راحت هي وشافته يبجي على حليب رادت تروح تسويله شافت مرت عمها ام عباس جاية اليوم..كلش ضاجت هاي ام ايمن وعباس...
سلمت وكلبها يرجف خوف وتكول هي ماتزورنه بالسنة حسنة بس لا جاية تخطب..اجتاحتها رجفة وخوف مو طبيعي وبطنها انخبصت...
وظلت تهدي نفسها انو ابوها مستحيل يسمح ينطيها لعباس لو ايمن هو واعدها ومايخلفلها بوعد ابداً....
وسمعت عمها هم جاي لأبوها بالديوانية وظلت توهوس يأثرون على ابوها هو ابوها يحترم اخوه هذا لأنه يختلف عن اخوانه وخوش رجال....
بس مدري ليش ولده عارات طلعو بالرغم جان يحاسبهم وحتى يضربهم على الصلاة وانسان مؤمن..وهو ومرته عركة على سالفة الولد..هي تغطي عليهم ومن يضربهم ماتقبل...
لمن سيبتهم وضيعتهم بسبب سترها عليهم ودفاعها عنهم من يحاسبهم ابوهم...
ظلت حوراء ايد بالغسالة وايد لأخوها الزغير ونسوان ابوها كاعدين يم مرت عمها...وآخر شي بالغرفة واكفة بالباب تسمع شيحجون بالصالة...
وسمعتهم يكولون والله ابن عمها ماتلكه احسن منه وابوها طبعاً ماينطي غريب غير ابن عمها ماتاخذ...
حوراء ظلت تفتر الدنيا بيها وظلت تتكلب معدتها ومغص لزمها وظلت ترجف والخوف اجتاحها وحتى اية لاحظتها....
آية بخوف:حوراء شبيج وجهج صار اصفر
حوراء انفجرت بالبجي وترجف حيل:بابا...بابا..وظلت بس تردد بابا...........
نرجع لبيت شيخنه😌...
هشام جان طالع توه راجع للبيت... ويريد يدخل بيتهم نزل يفتح باب الكراج...
صفية جيرانهم تمد راسها من الباب واطل يمين ويسار جانت داخل من اجه هشام نبكت طلعت...
صفية سنونها الكدام طافرات ليبرا شوي ونص شعرها طالع من الحجاب ودشداشتها كصيرة مطلعه سيقانها وبرجلها نعال زلم جبير حشه القارئ...ومصبغة اظافر رجليها احمر...
يعني شكلها يكول من هاي الي شاردين من مصح عقلي خطية انوب مبهذلة وخبلة...هي جبيرة عمرها بالثلاثينات هي تخبلت بسبب زوجها الي طلكها وخذه جهالها وسافر بره العراق...
لذلك فقدت عقلها وصارت هيج خطية وصارلها حادث وصارت ماتلفض نص الحروف تعورت بفكها...ومواتبة هشام كلما يطلع تكله الوحن فدوة للشيخ ماعدها غير هل الكلمة 😂😂😂...
مرات جهال عزام يفلكوها حجار ويأذونها خطية وهشام يصيح عليهم ويدخلهم وهي تتمسك بي...
صفية صاحت:الوحن فدوة للشيخ الساك
هشام سمعها ولزمته الضحكه على كلمة ساك عود صاك هههههههه...
هشام هز ايده:الحمدلله الهي على نعمة العقل..يابه روحي داخل لا يجون الجهال يفشخونج مثل ذاك اليوم
صفية صوتها خشن:فدوة شيخ لتخليهم يدربوني
هشام بضيمه ضحك:دخلي داخل ومحد يضربج....
وراح صعد سيارته دخلها داخل....ونزل يريد يسد الباب...
صفية: شيخ اتانيك تخبطني خوش..امي تكول خل يجي الشيخ يخبطج مايصير عيب تحاجينه بالشارع
هشام ابتسم الها ياخذها ع كد عقلها:اي صار تدللين اليوم ادز الحجية تخبطج على كولتج هههههه بس دخلي داخل عيب..الي تصير مرت الشيخ ماتطلع بالشارع
صفية:اي اي وجيب بدلة عرث(عرس) وياك..ايمانو لا تجيبها تكرصني خبيسة...(خبيثة)
هشام:اي ولون برتقالي بعد شتردين..حتى هالمسكينة ماسلمت من شر ايمان...
وسد الباب وهو يضحك على سوالفها ويشفق عليها الي خلاها تفقد عقلها ظالم...
دخل داخل واستقبلته نسمة كلتله الله يساعدك....
بعدها ماكملت اجت ايمان طايرة...الله يساعدك ياشيخ وعساك عالكوة وبيدها كلاص مي وتتلوك وزلقت روحها ازلق كدامه....
هاي كله هيج صايرة هل ايام ولسان معسول وتتكشخ وتتمضحك ويه هشام وهو مو دايرلها بال يعرف شنو غايتها..وميريد ينطيها امل ابداً ابداً..لو تفهم الي شايله بروحه من محبة لأخوه جان ماسوت هيج....
ونسمه تباوعلها وتكول بكلبها..هاي شكد تتلوك بس شكلها مو سهلة هو الشيخ مبين عليه خوش انسان ليش مزوج هاي العوبه مادري....
رقية كاعدة بالغرفة مالتها وجاي تتصفح بتلفونها وجان تجيها رسالة من رقم غريب....
كاتبلها...هلاوو رقية ممكن احاجيج بموضوع مهم......يتبع
